Press Release No. 212

October 29, 2021

MIDUYOG ang Provincial Government of Bukidnon (PGB) sa kasaulogan sa ika-24 ka tuig nga katukuran sa Indigenous People’s Right Act of 1997 (IPRA) Law, pinaagi sa usa ka ritwal nga gipangunahan ni Ex-Officio Board Member Datu Richard D. Macas, Provincial Indigenous Peoples Mandatory Representative (IPMR), nga gipahigayon kaganihang buntag sa National Commission on Indigenous Peoples (NCIP) Building, Barangay 9, Malaybalay City, Bukidnon kauban ang mga Municipal IPMRs, inubanan sa temang “Ang Paglalalakbay ng Katutubong mamamayan para sa Tunay na Pagkilala, Paggalang at Sariling Pamamahala.” 

Gipasabot ni Datu Macas nga ang paghandom sa anibersaryo sa IPRA Law usa ka mahinungdanon nga kasaulogan aron sa paghatag ug importansya sa pagkabalaod sa IPRA nga maoy nagpagahom sa katawhang lumad. Dili makab-ot ang tinuoray nga pagpagahom sa katawhang lumad kung dili matuman ang tulo (3) ka aspeto nga mao ang Socio-Cultural Aspect nga mao ang pag-edukar sa kaigsuonang lumad aron malikay sa pagbiay-biay sa kumonidad; ika-duha ang Economic Empowerment kung aha matudluan sila nga makatindog sa ilang kaugalingong mga tiil sa kalihukan nga adunay kalambigitan sa ilang kultura ug mahimong kaabag sa kalambuan sa panggobyerno ug ekonomikanhong aspeto; ug ang ikatulo mao ang Political Empowerment kung aha mahatagan sila ug katungod diha sa lumadnong teritoryo ilabi na sa pagdumala sa yutang kabilin.

“Kung wala si Governor Zubiri, medyo maglisod gyud ang katawhang lumad, kung unsa ang naabot sa katawhang lumad karon pinaagi kana sa dako nga tabang ni Governor Zubiri” mao kini ang gibutyag ni Datu Macas sa iyang mensahe-pasalamat ngadto kang Governor Jose Ma. R. Zubiri Jr, kinsa

makanunayong nagsuporta sa mga lumad sukad pa kaniadto, pinaagi sa paggahin ug pundo alang sa pag-abag sa galastuhon sa pagpatitulo sa mga ancestral domain, ingon man ang pagpalingkod sa mga Barangay/City/Municipal/ Provincial IPMRs, diin gihatagan sila ug higayon ug katungod nga mamuno diha sa ilang tagsa-tagsa ka ginsakopan.

Sa katapusan, hugtanong giawhag ni Datu Macas nga kinahanglang magkahiusa ug magtinabangay ang ang mga tribu aron makab-ot ang tinuoray nga pagpagahom sa katawhang lumad.

###