Press Release No. 214

Nobyembre 2, 2021

GIDAYEG sa Provincial Health Office (PHO) ang 100% nga pagsuporta ni Provincial Governor Jose Ma. R. Zubiri Jr. alang sa nagpadayong pagpamakuna alayon sa gipatumang National Vaccination Program sa Department of Health (DOH).

Una nang nag-awhag si Governor Zubiri ngadto sa tanang katawhan sa probinsya, pinaagi sa usa ka radio announcement nga magpabakuna na sa mas labing dali nga panahon aron masigurong protektado ug malikay sila gikan sa grabe nga COVID-19 virus ug mabalik na ngadto sa normal ang dagan sa panginabuhian ingon man ang pag-eskwela sa mga kabataan.

Sa bag-ong gipagula nga HERD immunity coverage sa probinsya, pinetsahan Nobyembre 1, 2021, anaa pa lamang sa 25.87% o 276,442 ka indibidwal pa lamang ang kompletong nabakunahan gikan sa 1,068,778 nga target population niini, hinungdan nga ang buhatan sa Gobernador, inabagan ni provincial legal officer ug OIC-provincial administrator Atty. Paul Vincent G. Villegas nag-aproba sa hangyo sa PHO nga magmugna ug dugang vaccination team alang sa ipahigayon nga libreng pagpamakuna karong umaabot Nobyembre 9-12, 2021 diha luyo sa Centennial Stage, Kaamulan Park, Provincial Capitol, Malaybalay City. Gilantaw sa nasangpit nga mga buhatan nga pinaagi niini, mas mapadali pa ang pagbakuna ug makab-ot ang gihandom nga 70% herd immunity sa dili pa matapos ang tuig 2021.

Gibutyag usab ni Ms. Jeanifer Malazarte, ang Maternal, Newborn, Child Health & Nutrition (MNCHN) Coordinator sa PHO, atol sa pakighinabi kaniya sa programang “Isumbong Mo Kang Governor” nga gisugdan na didto sa Bukidnon Provincial Medical Center (BPMC), niadtong adlaw’ng Byernes, Oktubre 29, 2021 ang pagbakuna ngadto sa mga kabataang nag-edad 12-17 anyos nga dunay mga gihambin nga balatian sama sa cardiovascular diseases, tuberculosis, renal disorder, immunocompromise ug uban pang balatian. Samtang gilauman nga masugdan na usab ugmang adlawa, Nobyembre 3 hangtud Nobyembre 5, 2021 sa tanang Local Government Unit (LGUs) ang pagbakuna alang niadtong nag edad 12-17 anyos.

###