Press Release No. 215

Nobyembre 3, 2021

PORMAL nga gibuksan ang Molecular Laboratory nga anaa nahimutang sa Bukidnon Provincial Medical Center (BPMC), pinaagi sa Inaugural Ceremony and Thanksgiving Program kaganihang buntag, Nobyembre 3, 2021, kung aha una nga gipahigayon ang Santos nga misa ug gisunod ang pormal nga programa.

Gibutyag ni Dr. Miguel Antonio C. Prantilla, ang chief of hospital sa BPMC nga usa kini ka kalampusan nga angayang ipasigarbo tungod kay dako kini nga tabang sa probinsya sa Bukidnon alang sa early detection sa COVID-19 cases, sanglit mas mapadali naman ang contract tracing ug ang pag-isolate sa mga nagpositibo ug mga close contacts niini. Pinaagi usab niini, dako ang posibilidad nga mokunhod na ang positivity rate sa probinsya.

Gilauman nga ugmang adlawa, Nobyembre 4, 2021 ipahigayon ang pag dry-run sa mga specimen niadtong mga pasyente sa BPMC ug BPMC Ligtas Covid Center- Isolation Facility, aron masiguro ang hapsay nga operasyon sa umaabot nga mga testing. Samtang mapahimuslan na kini sa tanang lungsod ug syudad sa probinsya sa umaabot adlaw’ng lunes, petsa 8 sa bulan sa Nobyembre tuig 2021, kung aha prioridad niini kadtong adunay sintomas o na-expose sa COVID-19 patient. Makahimo kining modawat ug 300-500 specimen matag adlaw, diin 24 hours ang gilaumang pinakubos nga releasing hours niini.

Ang maong health facility nahimong kabahin sa gigahinan sa pondo gikan sa Bayanihan To Heal as One Act nga adunay kinatibuk-ang kantidad nga ₱125-million alang sa probinsya sa Bukidnon, samtang migahin usab ang Pangagamhang Probinsyal sa ₱1.5-million aron sa pagkumpleto sa mga kakulangon sa maong laboratory, og laing pundo alang sa mga sweldo ug benepisyo sa mga personahe niini.

Mitambong sa maong programa sila si Atty. Paul Vincent G. Villegas, provincial legal officer/OIC provincial administrator nga mao ang nagrepresenta kang Provincial Governor Jose Ma. R. Zubiri, Jr.; Dir. Jose R. Llacuna, Jr., ang Department of Health (DOH)-10 regional director; Dir. Jaime S. Bernadas, DOH-7 regional director; Dr. Mary Jean P. Loreche, Anatomic & Clinical Pathologist sa DOH-7; Dr. Sulpicio Henry M. Legaspi, Jr., DOH-12 assistant regional director; Dr. Vincent C. Raguro Development Management Officer V sa DOH-Bukidnon, Dr. Gary Guido C. Tabios, Jr., provincial health officer; ug mga personahi sa DOH ug BPMC.

###