Press Release No. 216

Nobyembre 5, 2021

GIPANGHINGUSGAN sa 26th Sangguniang Panlalawigan (SP) ang pagpalig-on sa gisagop nga “Bantay ASF sa Barangay” nga programa sa Department of Agriculture (DA), pinaagi sa pagduso ug Resolution No. 2021-3431 (26th) SP “A Resolution Adopting Administrative Order No. 7 series of 2021, of the Department of Agriculture on the Guidelines Implementing the Bantay ASF sa Barangay” Program in the Province of Bukidnon.”

Nakalatid sa maong resolusyon nga aron mas mapalig-on ug magmalampuson ang pagpakgang sa nagpadayong hulga sa African Swine Fever (ASF), kinahanglang ipatuman sa matag Local Government Units (LGUs) ang maong programa pinaagi sa hiniusang pwersa sa Department of Agriculture- Agriculture Training Institute (DA-ATI) Region 10, Department of the Interior and Local Government (DILG) ug sa Provincial Veterinary Office (PVO) aron sa pagbansay sa mga Barangay Biosecurity Officers (BBOs). Gani, nagpadayon karon ang paghan-ay sa matag LGUs alang sa implementasyon niini, diin gibansay na ang mga BBOs nga maoy gitahasan isip frontliners diha sa pagpahigayon ug ASF negative monitoring o magpatuman sa mga balaod kalabot sa ASF surveillance diha sa ilang hurisdiksyon.

Taliwala nga ang probinsya sa Bukidnon nagpabiling luwas o anaa sa “Free Zone” gikan sa African Swine Fever (ASF) basi sa pinakabag-ong ASF Zoning Status sa Department of Agriculture – Bureau of Animal Industry, pinetsahan Oktubre 28, 2021, hingpit pa gihapon nga gipahimangnuan ang tanag Local Government Unit ug kabarangayan nga magpabiling mabinantayon ug alerto diha sa ilang ginsakupan aron mapakgang ang maong virus. Gani, kanunay ang pag-disinfect ug pag-inspeksyon sa tanang pang-publiko ug pribadong sakyanan nga mosulod sa probinsya, ingon man ang pag-confiscate sa mga tanang produkto nga gama sa karneng baboy (processed/unprocessed).

Mahinumduman nga nagpagula si Provincial Governor Jose Ma. R. Zubiri, Jr. ug Executive Order No. 35 nga temporaryong nagdili sa pagpasulod sa mga binuhing baboy, karneng baboy ug mga produkto nga gama sa karneng baboy nga naggikan sa kasikbit nga mga probinsya niini sa tibuok nasud, diin padayon pa gihapon kining gipatuman diha sa trese (13) ka mga Provincial Veterinary Sanitation Checkpoints sa probinsya.

###