Nobyembre 5, 2021 / Press Release No. 217

GI-AWHAG sa Provincial Government of Bukidnon (PGB), pinaagi nila ni provincial health officer Dr. Garry Guido C. Tabios Jr. ug ni Dr. Antonio Miguel C. Prantilla, ang chief of hospital sa Bukidon Provincial Medical Center (BMPC), nga mao usab ang COVID-19 Center sa probinsya, ang tanang katawhan nga magpabakuna na gayud sa mas labing dali nga panahon, kini atol sa pakighinabi kanila panahon sa “Isumbong Mo Kang Governor” radio program, kagahapong adlawa, Nobyembre 4, 2021.

Gihatagan ug gimbug-aton ni Dr. Tabios ang kamahinundanon sa pagpabakuna, gawas nga maprotektahan ang katawhan gikan sa grabe nga COVID-19 virus, matabangan nato ang atong ekonomikanhong kalihukan nga mobalik ngadto sa normal sama sa atong naandan sa milabay nga mga katuigan. Dugang niya nga kung ang tanan magpabakuna na, mamahimo nang makontrol ang COVID-19 virus ug dili na nato masinati ang kahadlok ug kabalaka nga atong natagamtaman sa milabay nga tulo ka bulan gumikan sa pagdagsang sa atong kaso, kung aha pipila ang nag-antos nga mga pasyente tungod sa kapuno sa atong mga hospital.

“Kung ikaw wala mabakunahan, 0% percent ang imong proteksyon ug 0% ang assurance nga maluwas ka. So, buot pasabot dako kaayo ang tsansa nga kita madisgrasya kung kita dili magpabakuna. Atong nakita sa statistics nga 98% of the time, ang mga vaccinated nga nilahos didto sa grabi-grabi nga epekto sa COVID, 98% naluwas sila ug 2% lang ang nadisgrasya. Apan kung ikaw dili bakunado ug magsakit ka sa COVID nga magrabihan ka, labaw pa sa 95% nga mamatay ug 5% lang ang tsansa nga ikaw mabuhi” mao kini ang pamahayag ni Dr. Prantilla sa iyang mensahe isip paghatag ug sa katawhan nganong gikinahanglan nga magpabakuna na gayud.

Sa susamang hisgutanan, gibutyag usab ni Dr. Prantilla nga ang bag-ong gibuksan nga Molecullar Laboratory sa BPMC usa sa mga instrumento nga makatabang alang sa pagpakunhod sa atong kaso tungod kay mas sayo na nga mahibaloan ang resulta sa Reverse Transcription–Polymerase Chain Reaction (RT-PCR) kumpara kaniadto nga pagadal-on pa kini sa Cagayan de Oro City. Dugang ni Dr. Prantilla nga ang maong laboratory mamahimong moproseso dili lamang alang sa COVID-19 virus kung dili lakip na usab ang uban pang viral diseases nga posibling masinati sa umaabot.

Sa bag-ong HERD immunity coverage sa probinsya, as of Nobyembre 5, 2021 (10:00am), anaa pa lamang sa 26.90% o 287,507 ka indibidwal pa lamang ang kompletong nabakunahan gikan sa 1,068,778 nga target population niini.

###