Press Release No. 219 / November 12, 2021

GI-APROBAHAN ni Provincial Governor Jose Ma. R. Zubiri, Jr. ang paghatag sa financial assistance ngadto sa mga Persons with Disability (PWD) Federation Presidents sa matag lungsod ug syudad sa probinsya, pinasikad sa gipalabang nga ordinansa sa Local Magna Carta for Persons with Disabilities in the Province of Bukidnon.

Gipasabot ni Mr. Dominador Libayao, ang Disability Affairs Office IV/Chief sa PGO-PDAD nga nakalatid sa Section 9, Sub-section 9.10 sa Article II sa maong ordinansa ang pag-ila ug pahatag akreditasyon sa tanang Federation Presidents nga maoy gipili sa ilang myembro nga magrepresentar kanila. Usa sa mga prebilihiyo sa Federation Presidents ang pagdawat ug binulan nga ayudang-pinansyal kantidad Php3,000.00 matag bulan gikan sa panudlanan sa probinsya sugod sa bulan sa Setyembre tuig 2021, sanglit mohimo man sila sa pag-duty sa lokal nga kagamhanan, magsumite sa mga accomplishment reports ug mamuno sa ilang ginsakupan. Apan tungod sa budgetary constraint gumikan sa nagpadayong hulga COVID-19 pandemic, nga maoy unang gitutukan ug gihatagan ug pagtagad sa atong probinsya, gipaubsan kini ngadto sa Php2,000.00 matag bulan. Taliwala niini, gipanghinaot ni Mr. Libayao nga maningkamot ang Pangagamhanang Probinsyal sa Bukidnon nga matuman na ang nakalatid nga Php3,000.00 nga financial assistance matag bulan kung makalingkawas na kita niining pandemic. Gilauman nga sa umaabot Nobyembre 15, 2021, makaperma na sila sa certificate of indigency aron nga makuha na usab nila ang maong ayuda.

Nahisubay usab sa maong ordinansa ang mga oportunidad, katungod ug kaayuhan nga posibleng matagamtaman sa usa ka PWD members nga naglangkob sa Disability Inclusive Health Programmes, Disability Inclusive Education sama sa scholarship, Disability Inclusive Economic Programs sama sa livelihood training, Disability Right to Empowerment ug Right to Accessible Built Environment, Information and Transportation.

As of December 31, 2021, aduna nay 20,347 ka mga rehistradong PWDs sa probinsya, diin ang Pangagamhanag Probinsyal sa Bukidnon padayon nga naningkamot sa paghatag sa insakto ug patas nga pagtagad kanila, ingon man ang paghatag ug higayon ngadto kanila nga molambigit sa mga kalihukan diha sa ilang kumonidad.

###