Press Release No. 221 / November 18, 2021

MIPADAYAG si Provincial Governor Jose Ma. R. Zubiri, Jr. sa iyang dakong pagkadismaya human masayran ang proposal sa pagkibhang o pagkaltas sa Senado sa pondo alang sa mga nakahan-ay nga mga programa ug proyekto sa National Task Force to End Local Communist Armed Conflict (NTF-ELCAC) alang sa sunod tuig 2022.

Kini ang unod sa mensahe sa sulat-apila nga gipadangat ni Governor Zubiri ngadto sa 26th Sangguniang Panlalawigan nga gilauman nga mapandayan ug resolusyon aron ipaabot ngadto sa Senado ang sentimyento sa katawhan sa lalawigan nga gibatbat usab ni Peace and Order Committee Chairman Atty. Oliver Owen L. Garcia, Ex-Officio Board Member atol sa ika-117 nga regular session niadtong Nobyembre 16, 2021 sa SP Session Hall, Capitol Compound, Malaybalay City, Bukidnon.

Nagtuo si Governor Zubiri nga ang NTF-ELCAC, nakatuman sa iyang mandato ug nagpabiling lig-on sa iyang misyon sa pagpalambo sa kahimtang sa kalinaw ug kahusay sa probinsiya ug sa nasud. Ang Pangagamhanan sa Probinsiya sa Bukidnon usa sa mga nagtuo nga hangtod karon, kini ang labing epektibo nga estratehiya aron matubag ang punoan nga hinungdan sa insurhensya sa usa ka malangkubon nga pamaagi. Ang mga programa ug proyekto sa task force, dako kaayo ug tabang sa atong mga kabus nga kaigsoonan, ilabina sa atong mga Lumad nga anaa sa hilit nga mga dapit.

Dugang pagpadayag sa gobernador nga gipahimuslan na karon ang mga programa padulong sa mas dako nga kalamboan ug gipanghinaut nga dili maundang ang paghatud sa mga serbisyo sa nagkadaiyang barangay, kung aha ang pagkunhod sa pundo sa NTF-ELCAC magwagtang usab sa kahigayonan sa mga barangay nga kabos nga makasinati usab ug malahutayong tingusbawan. Nagtoo ang amahan sa lalawigan nga angayan usab sila nga makatagamtam sa mga panalangin sa padayon nga paningkamot sa atong kagamhanan. Daghan na ug nahimo ug mas daghan pa ang mahimo sa moabot nga panahon.

Sumala ni Governor Zubiri nga gipahimuslan kini nga higayon sa katawhan sa Bukidnon aron ipakita ang lig-ong suporta sa misyon sa Task Force ug ilhon kung unsa ang nahimo niini sa pagpasiugda sa malungtarong kalinaw ug kalamboan. Busa, hugot ang panawagan niini sa Senado sa Pilipinas nga suportahan usab ang katuyoan ug mga pangandoy nga tapuson na ang mga dekada sa insurhensiya ug magkahiusa sa pagkab-ot sa malangkubon ug malungtarong kalinaw.

Alang sa tuig 2021, ang Bukidnon nabahinan sa kinatibuk-ang ₱1.420 Billion sa Local Government Support Fund-Support to Barangay Development Projects alang sa 71 ka mga barangay diha 14 ka mga Local Government Units sa lalawigan. Kini gilangkuban sa mga proyekto nga mismong ang katawhan sa barangay ang nag-ila sa mga kakulangon ug panginahanglan.

###