Press Release No. 222 / November 18, 2021

GISUSI ni Provincial Governor Jose Ma. R. Zubiri Jr. ang mga nabahaan sa Barangay Camp 1 ug Barangay South Poblacion sa lungsod sa Maramag, Bukidnon karung adlawa- Nobyembre 18, 2021.

Ang maong pagsusi sa gobernador aron makita kung unsa ang level sa damyos nga nahiaguman sa katawhan sa pagbaha ug masiguro ang insaktong tabang ang mahatud kanila niadtong Martes sa gabii- Nobyembre 16, 2021.

Adunay 120 ka pamilya kung aha anaa sa 407 ka tawo ang naapektuhan sa Purok 5, Purok 2, Purok 1-A ug Purok 1-B sa Barangay Camp 1. Samtang sa Purok 9-A, Purok 9 ug Purok 1 sa Barangay South Poblacion, adunay 96 ka pamilya nga apektado ug sa Barangay Base Camp, adunay 48 ka pamilya ang naapektuhan sa maong pagbaha diin kamulo pa usab gisusi ang listahan sa residente sa kada barangay.

Diha-diha nga gipalihok ni Governor Zubiri ang Provincial Disaster Risk Reduction and Management Division ingon man sa Provincial Social Welfare and Development Office ug Provincial Engineer’s Office uban sa presensya ni 3rd District Board Member Joseph B. Palmada, Mayor Jose Joel Doromal ug ang mga kapitan sa nasangpit nga mga barangay aron sa pag-assess sa mga biktima.

Ang totally damaged nga mga balay, makadawat sa tag-5,000 pesos ang matag pamilya samtang tag-3,000 pesos usab kadtong partially damaged. Sa maong adlaw, midalikyat usab sa pagsusi si Governor Zubiri sa yuta nga mamahimong pagatukuran sa umaabot 150 ka balay alang sa mga apektadong residente sa Barangay camp 1, kauban ang Provincial Engineer’s Office nga gipanguluhan ni Provincial Engineer Albert D. Yulo ug si Board Member Palmada.

###