Press Release No. 223 / Nobyembre 19, 2021

BENEPISYARYO ang 36 ka mga farmers association sa Bukidnon sa 100-units nga nagkalain-laing agricultural machineries ubos sa Rice Competitiveness Enhancement Fund (RCEF) Mechanization Program sa Department of Agriculture (D.A), diin usa ka turnover ceremony ang gipahigayon kagahapong adlawa, Nobyembre 18, 2021 sa Kaamulan Open Theater, Kaamulan Park, Malaybalay City, Bukidnon.

Sa mensahe ni Mr. Joel Dator, ang Facility Management and Field Operations Division Chief, nakita sa Department of Agriculture ang panginahanglanon sa mga mag-uuma, ilabi na dinhi sa Bukidnon nga usa sa mga nag-unang supplier sa humay sa tibuok nasud, kung aha kinahanglan na gayud ang dugang makinarya aron mas mapadali ang produksyon og mapasayon ang ang pag-ani ug pagproseso sa ilang humay paingon sa mga kamerkadohan. Tungod niini, nagbuhat sila ug lakang nga matubag ang mga panginahangalanon sa mga mag-uuma sa humay nga nagresulta niini nga pag-apod-apod sa mga makinarya.

Hugot nga gisuportahan ang maong programa ni 3rd District Congressman Manuel “Manoy” F. Zubiri, kinsa usa sa mga bisita niini nga okasyon. Sa iyang short message alang sa mga mag-uuma, gipadayag niini ang plano nga pagbuhat ug lakang aron mapatas-an pa ang budget alang sa mga panginahanglan sa agrikultura ilabi na ang pagbuhat ug mga post-harvest facilities dinhi sa Bukidnon aron masiguro nga aduna gayud insaktong pundohanan ang mga ani sa pagsiguro nga dili kini madaot o makontamina sa tinguha nga presko kining mapalit sa merkado.

Ang maong plano ni Cong. Manoy gisuportahan usab ni Regional Director Carlene C. Collado sa DA-RFO-X diin gipanghinaot usab niya nga mapalambo pa ang sistema sa agrikultura ug makadawat pa ang tanang mag-uuma sa Bukidnon niining mga makinarya tungod kay dako kini nga tabang sa ilang panginabuhian. Sa katapusan, gipahimangnuan niya ang mga benepisyaryo nga kinahanglan ampingan ug gamiton nila ang maong makinarya ug gamiton sa insaktong paagi.

Lakip sa farm machineries nga ilang i-apod-apod mao ang four-wheel tractor, Hana Tractor, floating tiller, transplanters, reaper, combine harvester, thresher, recirculating dryer, rice mill ug destoner diin mikabat kini sa kinatibuk-ang kantidad nga Php.127, 257, 865.00.

###