Press Release No. 224 / November 22, 2021

GIPASIDUNGGAN ang probinsya sa Bukidnon isip 3rd-time awardee sa mapadayunong programa niini sa pagpakunhod sa stunting rate sa kabataan nga nag-edad gikan sa 0 ngadto sa 59 ka bulan sulod sa tuig 2018-2021, diin usa ka plaque of commendation ang gihatag sa National Nutrition Council (NCC) Region 10 sa gipahigayon nga 2021 Virtual Regional Nutrition Awarding Ceremony (RNAC), niadtong Nobyembre 18, 2021.

Ang gipahigayong awarding gipaagi sa paghatag ug incentives/awards sama sa Green Banner Seal of Compliance, Special Citations, Award of Merit, and Outstanding LNFP, diin mipailalom sa makuti nga pag-evaluate ang matag Local Government Units (LGUs), Nutrition Action Officers (NAOs), Local Nutrition Program Coordinators (LNPCs) ug Barangay Nutrition Scholars (BNS) nga midawat sa talagsaong pasidungog.

Lakip sa gidayeg ug gipasidunggan isip 3rd-time awardee alang sa padayong nagpakunhod sa ilang stunting rate mao ang lungsod sa Kibawe ug Quezon; 2nd time awardee usab ang lungsod sa Kadingilan, Manolo Fortich ug Talakag; ug 1st time-awardee ang lungsod sa Damulog, Don Carlos, Kitaotao ug Sumilao, Bukidnon.

Gihatag usab ang Green Banner Seal of Compliance ngadto sa lungsod sa Maramag, Sumilao, Cabanglasan ug Impasug-ong, samtang Nutrition Honor awardee usab ang syudad sa Valencia, lungsod sa Don Carlos, Kadingilan ug Quezon alang sa Award of Merit. Midawat usab sa Plaque of Special Citation isip National Honor Award Contender ang lungsod sa Manolo Fortich, Bukidnon.

Ang NCC gimanduan sa gobyerno sa pag-monitor, pag-evaluate ug pagpatuman sa mga plano ug programa sa nutrisyon, pinaagi sa pagsusi sa epektibong lakang sa mga LGUs diha sa paghatod ug insaktong serbisyo sa hustong nutrisyon sa ilang tagsa-tagsa ka hurisdiksyon.

###