Press Release No. 225 / November 22, 2021

MI-KURTESIYA kang Provincial Governor Jose Ma. R. Zubiri, Jr. ang personahe sa National Bureau of Investigation (NBI)-Bukidnon District Office, pinangunahan ni Special Investigator V Danilo J. Cabanlet, JD kaganihang sayo sa buntag-Nobyembre 22, 2021 sa Opisina sa Gobernador.

Kini alayon sa pagahimoong blessing, pinaagi ni Fr. Angel Comabig karong adlawa sa gitagana nga NBI-Bukidnon District Office sa Provincial Government of Bukidnon, pinaagi ni Governor Zubiri diha sa 3rd Floor National and Provincial Offices (Old Hospital Building), Capitol Compound, Malaybalay City, Bukidnon.

Kini nagpasabot nga mamahimo nang moasikaso sa imbestigasyon sa mga isang-at nga kaso ang maong ahensya nga magserbisyo sa katawhan sa Bukidnon.

Mahinumduman nga nagsugod ang NBI dinhi sa Bukidnon niadtong Agosto 1, 2016 isip Satellite Office human gi-arpubahan sa NBI ang hangyo ni Governor Zubiri nga mabutangan ug Satellite Office ang probinsya aron magpasayon sa transaksyon nga pagahimoon sa katawhan nga nagkinahangan sa serbisyo sa nanganlang government agency. Nasayran nga ang Pangagamhanang Probinsyal kanunay nga naggahin sa pondo kantidad ₱1.2-million alang sa kinahanglanon sa maong opisina.

Kaniadto, dili ti-aw ang sakripisyo ug kahago sa katawhan nga kinahanglan pa muadto sa NBI North Eastern Mindanao Regional Office (NEMRO) sa Cagayan de Oro aron makakuha o maka-renew sa ilang NBI Clearance.

Sa kasamtangan, nagpabilin ang buhatan sa NBI alang sa releasing sa NBI Clearance diha sa PCSO Building kilid sa DBP-Capitol, samtang ang imbestigasyon sa posebling isang-at nga kaso dinhi i-akumudar sa National and Provincial Offices, pinaagi sa bag-ong gimontar nga NBI-Bukidnon District Office.

###