Press Release No. 227 / November 23, 2021

GI-BISITA ni Provincial Governor Jose Ma. R. Zubiri ang mga nabahaan sa Barangay San Jose sa lungsod sa Quezon dinhi sa probinsya sa Bukidnon kagahapong adlawa- Nobyembre 22, 2021. Kauban ang duha ka Board Members sa ikatulong distrito sa probinsya, Board Member Joseph B. Palmada ug Board Member Benito U. Baguio.

Ang maong pagbisita sa gobernador aron masusi ang kahimtang sa katawhan sa Barangay San Jose nga nabahaan niadtong sabado sa gabii- Nobyembre 20, 2021. Matud sa gobernador, natingala kini nganong nabahaan ang maong dapit sanglit anaa man kini sa taas nga bahin sa probinsya. Apan matud ni Provincial Disaster Risk Reduction Management Officer IV Mr. Israel Johan M. Damasco Jr., tungod kini sa grabi ka makusog nga ulan diin maoy hinungdan sa paglapaw sa tubig diha sa kanal ug tulay nga nahimutang sa Barangay San Jose.Adunay 216 ka pamilya ang labing naapektuhan sa maong pagbaha sa Purok 13- Zubiri Village, Purok 14- San Miguel ug Purok 15, ug Purok 17- Sunshine. Kamulo pa usab ang dugang pagsusi sa listahan sa mga residente sa maong barangay.

Sa maong adlaw sa pagbisita, mitunol si Governor Zubiri sa tag 2,000 ka pesos matag pamilya nga na-apektuhan sa pagbaha pinaagi sa Provincial Social Welfare and Development Division sa pagpanguna ni PSWD Officer Ceferina O. Caiña. Diha diha usab giapilihok sa Gobernador ang Provincial Disaster Risk Reduction Management Division arun sa pag-assess sa mga nabahaan ug gipasusi usab niya sa Provincial Engineer’s Office nga gipanguluhan ni Provincial Engineer Albert D. Yulo ang maong barangay aron mahatagan ug aksyon ang problema sa pagsaka sa tubig sa kanal.

Gihatud usab kaganihang buntag sa kagamhanang probinsyal ang ayuda nga usa (1) ka sakong bugas ug usa (1) ka sa kahon nga mga delata sa matag pamilyang nabahaan didto sa Barangay Covered Court, Barangay San Jose sa Lungsod sa Quezon.

###