Press Release No. 228 / November 24, 2021

PASADO na sa 26th Sangguniang Panlalawigan ang usa ka resoluyon nga kusganong naghangyo sa Senado sa nasud nga huna-hunaon pag-usab ang desisyon nga kaltasan ang pondo nga nakagahin alang sa National Task Force to End Local Communist Armed Conflict (NTF-ELCAC) nga dakong maka-apekto sa paghatud sa mga programa ug proyekto agi ug suporta sa mga kalambuan sa nagkalain-laing hilit nga mga barangay o komunidad sa Probinsya sa Bukidnon.

Subay sa Resolution Resolution No. 2021-3724(26th SP), nga giduso ni Board Member Oliver Owen L. Garcia, pinitsahan Nobyembre 16, 2021 atol sa ika-117 nga regular session sa Sangguniang Panlalawigan, napadayag dinhi ang kabalaka sa katawhan sa lalawigan sa epekto sa desisyon sa Senado sa pagkaltas sa pondo nga maoy nag-unang pamaagi sa nasud nga matubag ang mga ugat-hinungdan sa insurhensya ug nahimong aktibo nga kauban sa paghatud sa mga batakang serbisyo ug sosyal nga kalamboan sa kadaghanan sa mga lugar nga apektado sa kagubot.

Sukad sa pagsugod sa ELCAC project nga gipaagi sa Local Government Support Fund – Support to Barangay Development Program, nikusog ang kampanya sa lokal nga kagamhanan, daghang barangay ang nahaw-as gikan sa mga kuko sa mga berdugong Communist Terrorist Groups ug ang mga lumulupyo niini malaumon sa ilang pangandoy alang sa usa ka ligdong nga kinabuhi, paghaw-as gikan sa kalisdanan ug ang hingpit nga pag-aginod sa ekonomikanhong kalambuan pinaagi sa malungtarong mga programa ug suporta sa gobyerno.

Ang probinsya sa Bukidnon nag-antos sulod sa daghang dekada sa purwesyo nga hatud sa communist terrorist groups ilabina sa mga hilit nga barangay nga nahimutang sa amihanang silangang bahin sa Bukidnon. Ang pamatuod niini mao ang malampusong pag-neutralisa sa pinakataas nga lider ug membro sa nasudnong komite sa NPA ug pagsurender sa daghang milisya ug regular nga membro sa walhong grupo.

Mahinumduman nga gipadangat ni Provincial Governor Jose Ma. R. Zubiri, Jr. ang iyang sulat-apila ngadto sa SP diin nagpadayag sa iyang dakong pagkadismaya human masayran ang proposal sa pagkaltas sa Senado sa pondo NTF-ELCAC alang sa sunod tuig 2022.

Kini alayon sa dakong pagtoo ni Governor Zubiri nga ang NTF-ELCAC, nakatuman sa iyang mandato ug nagpabiling lig-on sa iyang misyon sa pagpalambo sa kahimtang sa kalinaw ug kahusay sa probinsiya ug sa nasud.

Alang sa tuig 2021, ang Bukidnon nabahinan sa kinatibuk-ang ₱1.420 Billion sa Local Government Support Fund-Support to Barangay Development Projects alang sa 71 ka mga barangay diha 14 ka mga Local Government Units sa lalawigan. Kini gilangkuban sa mga proyekto nga mismong ang katawhan sa barangay ang nag-ila sa mga kakulangon ug panginahanglan.

###