Press Release No. 229 / Nobyembre 25, 2021

GIKALIPAY sa mga benepisyaryo sa Don Carlos Paglaum Village ang hingpit nga pagkompleto sa Pabahay Program nga nahimutang sa Don Carlos Sur, Don Carlos, Bukidnon, kung aha dugang 67 na usab ka mga balay ang gilaumang matukod sa maong lugar, pinaagi sa ground breaking ceremony nga gipahigayon kahagapong adlawa, Nobyembre 24, 2021.

Sa data gikan sa Provincial Governor’s Office- Real Estate & Housing Development Division (PGO-REHDD), ang dugang 67 ka mga housing units nga adunay 80 sq. m. average lot size ug 30 sq. m. floor area, gipunduhan sa Pangamhanag Probinsyal alang sa Phase III nga pagtrabaho sa proyekto, ubos sa paningkamot ni Governor Jose Ma. R. Zubiri, Jr. Kantidad Php330,000 per housing unit alang sa construction ang gi-alokar, pinasikad sa usa ka Memorandum of Agreement tali sa LGU-Don Carlos ug BLGU Don Carlos Sur, kung aha gihatagan ug prioridad niini ang kadtong pamilya nga apektado sa road widening, pagtukod ug merkado ug uban pang barangay infrastructure projects.

Mahinumduman nga una nang nahuman ug napapuy-an ang 100 ka housing units niadtong tuig 2010 ug 2012, kung aha napatuman kini pinaagi sapagtinabangay sa Provincial Government of Bukidnon (PGB), Municipal Government of Don Carlos ug Barangay Government of Don Carlos Sur. Kini nga hugna sa pagtrabaho gibubuan sa PGB ug pundo kantidad Php7,500,000.00 alang sa pagpatukod sa 100 housing units, diin ang lungsod usab sa Don Carlos mao ang nagsagubang sa uban pang galastuhon alang sa dugang materyales, land development ug labor, samtang ang 22,568 sq. m. land area gihatag sa Barangay Don Carlos Sur.

“Mga palangga ko, nalipay ko’g dako nga nakapalipay kini ninyo”, kini ang tipik-pamahayag ni Governor Zubiri ngadto sa mga benepisyaryo atol sa gipahigayon nga seremonya, diin gikalipay niya pag-ayo ang maong kalambuan nga nahimo sa probinsya, ilabi na niini nga usa sa iyang priority projects nga gitutukan aron mapahimuslan sa katawhang kabus sa lalawigan.

###