Press Release No. 230 / December 6, 2021

GIPAGULA sa Provincial Government of Bukidnon (PGB), pinaagi ni Provincial Governor Jose Ma. R. Zubiri, Jr. ang Executive Order No. 27, pinitsahan Oktobre 5, 2021, usa ka mando sa pagtukod ug pagpalig-on sa Provincial Bantay Asin Task Force (PBATF) sa Probinsya sa Bukidnon, pinasikad sa Akta Republika 8172 sa tuig 1995 nga naila isip ASIN Law. Tinguha sa maong balaod nga mawagtang ang micronutrient deficiencies sa probinsya, ilabi na ang Iodine Deficiency Disorder (IDD).

Nonot niini nga tinguha alang sa katawhan, gilusad sa PGB ang panagtagbo sa mga miyembro sa PBATF aron mahan-ay ug mapasabot ang mga nag-unang katungdanan ug mga responsibilidad niadtong Disyembre 3, 2021 sa PPDO Conference Room. Ang PBATF gilangkuban sa mosunod: Chairman ang Provincial Governor, Vice Chairman ang Provincial Health Officer/Provincial Nutrition Action Officer; ug mga miyembro ang Committee Chairman sa Committee on Health sa Sangguniang Panlalawigan, Provincial Agriculture Officer, Provincial Budget Officer, Provincial Disaster Rish Reduction and Management Officer, Supervising Administrative Officer sa PGO-Public Affairs, Information and Assistance Division, DILG-Provincial Director, PNP-Bukidnon Provincial Director, Bukidnon-Provincial Science and Technology Center, DOLE-Bukidnon Provincial Field Office, DepEd-Bukidnon School Division Superintendent, Salinas Food Corporation, ug Municipal Sanitary Inspectors.

Subay sa natakda sa maong kamanduan, gitahasan ang PBATF sa mosunod: paghimo ug pagpatuman sa mga polisiya, plano, ug interbensyon alang sa pagpaayo sa IDD; pakig-alayon sa pagpatuman sa PBATF ug ASIN law sa local level; pagsumite sa salt testing results and findings, lakip ang records sa paglapas sa Regional Bantay Asin Task Force ug sa Food and Drug Administration Regional Office; pag-monitor sa aksyon o report sa salt testing ug ipadayon ang gikinahanglan nga aksyon alang sa resolusyon; makig-koordinar sa ubang ahensya, hingtungdang NGOs, PO’s alang sa panginahanglanon kung gikinahanglan.

Ang Bukidnon usa ka landlocked area nga layo sa dagat busa ang source of iodine sa katawhan, nagdepende sa mga pagkaon nga adunay iodine. Ang kakulang sa iodine maoy sarang hinungdan sa pisikal and mental abnormalities, sama sa hypothyroidisim/hyperthyroidism, mental retardation, productive failures, ug retarded physical development.

Agi ug suporta ni Governor Zubiri niini nga kampanya sa pagwagtang sa Iodine Deficiency Disorder, nagtagana kini ug pondo alang sa pagpalit sa WYD salt tester nga maoy nag-unang gikinahanglan ekipo aron makapahigayon ang PBATF sa regular salt monitoring diha sa kamerkaduhan aron masiguro nga adunay iodine content ang ginapalit nga asin sa merkado.

###