Press Release No. 232 / December 7, 2021

MIDUYOG ang Provincial Government of Bukidnon (PGB) sa pag-obserbar sa 18-day alang sa pagsumpo sa Violence Against Women (VAW), pinaagi sa pagpahigayon ug usa ka forum karong umaabot Desyembre 10, 2021 diha sa Bukidnon National High School (BNHS) Gymnasium, syudad sa Malaybalay, subay sa gipagula nga Memorandum No. 279 ni Provincial Governor Jose Ma. R. Zubiri, Jr.

Tumong sa maong forum nga mahisgutan ang mga katungod ug pagpagahom sa kababayin-an ubos sa Akta Republika 9262 o Anti-Violence Against Women and their Children (VAWC), Akta Repulika 11313 o Safe Spaces Act (Bawal Bastos Law) ug Akta Republika 8353 o Anti-Rape Law, diin pagatukion ug ipasabot kini sa pinili nga tigpamababa sa Bukidnon Provincial Police Office sa Women and Children Protection Desk.

Ang 18 ka adlaw nga kampanya gisugdan niadtong Nobyembre 25 ug matapos sa Desyembre 12, 2021, sa panglantaw nga mapakusgan pa ang kampanya sa paghatag ug kagawasan sa mga kababiyan-an gikan sa tanang klase sa diskriminasyon ug abuso, mapa-pisikal, sexual, psychological o ekonomikang aspeto. Pinaagi niining kampanya, mahatagan ug kadasig ang mga kababayin-an nga kung dili sila magpaabuso, walay makapugong kanila nga molambo isip inahan, anak, asawa, higala o yanong lungsuranon diha sa ilang kuminidad.

Mahinumduman nga miduyog usab ang mga personahi sa Provincial Planning and Development Office (PPDO) sa gipahigayon nga VAW online kick-off ceremony niadtong Nobyembre 25, 2021, samtang usa usab ka FB live streaming ang gisalmutan sa mga pinili nga PGB employees niadtong Desyembre 3 kabahin sa Gender-Based Sexual Harassment in Public and Online Spaces. Gilauman nga lain Facebook live steaming na usab ang pagasalamutan sa PGB employees karong umaabot Desyembre 10, 2021.

Sa susamang hisgutanan, ang Provincial Legal Office (PLO), padayon nga nagpaabot sa ilang serbisyong legal alang niadtong mga biktima sa VAWC, ubos sa program ni Governor Jose Ma. R. Zubiri, Jr. nga Governor’s Legal Aid Program kon GLAP. Gani, mikabat na ngadto sa 57 ka mga kliyente ang nahatagan nila ug suportang legal, inabagan na usab sa Provincial Social Welfare & Development Office (PSWDO) ug Integrated Bar of the Philippines (IBP).

Kon aduna kamoy reklamo o sumbong kabahin sa Child Abuse o VAWC palihog text o tawag sa ilang numero 0905-646-8617, mamahimo usab kamong magpaabot sa inyong mensahe pinaag sa bukidnonlegal@gmail.com ug Provincial Legal Office-Bukidnon facebook account o ba kaha personal nga mobisita sa buhatan sa PLO.

###