Press Release No. 233 / December 7, 2021

Padayon ang pagpahimangno sa Pangagamhanang Probinsyal sa Bukidnon ngadto sa tanang nagplano nga mobisita sa atong Provincial Zoo og Playground nga mosunod gayod sa gipatuman nga mga direktiba sa probinsya sama sa pagdala sa ilang vaccination card o negative RTPCR test kon dili pa bakunado, valid ID ug magsunod sa minimum public health protocols sama sa kanunay nga pagsuot sa facemask, pag-alcohol ug pag mentinar sa 1-meter social distancing.

Mahinumduman nga gibuksan pagbalik sa publiko ang atong Provincial Zoo ug Children’s Playground niadtong Nobyembre 22, 2021, pinaagi sa usa ka semana nga dry-run, ug tungod sa nakita nga hapsay nga pamaagi, hingpit na kining gibuksan matag adlaw nga Martes hangtud Domingo gikan gikan sa alas 9:00 hangtud alas 11:30 sa buntag ug alas 2:00 hangtud alas 4:30 sa hapon.

Apan bisan pa sa mga pagpasidaan nga gibuhat sa PGB, aduna pa gihapoy pipila ka mga indibidwal nga wala masayud sa polisiya ilabi na ang pagpresentar sa ilang vaccination card. Tungod niini, padayon ang pahimangno nato sa publiko nga makisayod gayud sa mga gikinahanglang requirements sa dili pa mobisita Provincial Zoo ug Children’s Playground aron dili masayang ang inyong oras ug pamasahe.

Gipahinumduman usab ang publiko nga 50% capacity o 25 ka indbidwal lamang ang gitugutan nga mosulod sa maong pasilidad ug aduna lamang 30 ka minutos nga gigahin matag batch sa paglibot, pagsuroy o pagdula.

Sa impormasyon gikan ni Dr. Carmen S. Tangara, ang provincial zoo curator, mokabat ngadto sa 300 nga indibidwal matag adlaw ang mobisita sa provincial zoo panahon sa weekdays, samtang kung weekend mokabat ngadto sa 1,100 ka indibidwal ang mobisita sa atong provincial zoo.

###