Press Release No. 234 / December 21, 2021

MALAMPUSONG gipang-apod ang 33 ka mga baka ngadto sa farmer beneficiaries sa Kalugmanan, Manolo Fortich, Bukidnon, ubos sa National Task Force to End Local Communist Armed Conflict (NTF-ELCAC) Support to Barangay Development Project (SBDP) nga programa sa nasudnong Pangagamhanan, niadtong adlaw nga Lunes, Disyembre 20, 2021.

Base sa data, kinatibuk-ang 50 ka mga baka ang gigahin alang sa maong barangay, apan tungod sa sumbanan nga gitakda sa Provincial/Municipal Veterinary Office, 33 lamang ang unang naapod-apod ug gilauman nga mahatag ang nahabiling 17 ka mga baka sa dili madugay. Mokabat sa tag-35 mil ka pesos ang kantidad sa matag usa ka baka o 1,750,000.00 pesos, kung aha mokabat sa sobra sa 1.8 milyones ka pesos ang kinatibuk-ang pondo nga gigahin alang sa cattle dispersal lakip na ang purga ug bitamina nga gidapat ngadto sa mga baka usa kini gidawat sa benepisyaryo.

Lakip nga mitambong sa maong aktibidad sila si Ms. Cherry Lou Lafuente, nga nagrepresenta kang DILG Regional Director Arnel M. Agabe, provincial agriculturist Engr. Alson G. Quimba ug Municipal Mayor Clive D. Quiño, kinsa parehong mipaabot sa ilang pagpahalipay ngadto sa mga benepisyaro ug nanghinaot nga ila kining ipalambo ug gamiton sa insakto kay dako kini nga tabang gikan sa gobyerno alang sa ilang panghinabuhian. Gipasalamatan usab nila ang makanunayong pagsuporta ni Governor Jose Ma. R. Zubiri, Jr. sa programa sa NTF-ELCAC, kinsa dako usab ang panglantaw alang sa kalambuan sa matang sa agrikultura ug kalinaw sa probinsya. Mitambong usab si Punong Barangay Hernando G. Daluan ingon man ang mga kawani sa Sangguniang Panlungsod sa Manolo Fortich.

Ang NTF-ELCAC nahisubay ubos sa Executive Order No. 70 nga gipirmahan ni President Rodrigo R. Duterte nga gimugna aron mahatagan ug solusyon ang problema kalabot sa Local Communist Armed Conflict, pinaagi sa paghatag ug programa, proyekto o panginabuhian ngadto sa mga apektadong barangay, aron usab makatagamtam sila ug kalambuan diha sa ilang tagsa-tagsa ka komunidad.

###