Press Release No. 235 / December 23, 2021

MIANGKON ug mga benepisyo sa pagpanguma ang 118 ka mga mag-uuma gikan sa Barangay Mandahican ug Canangaan sa lungsod sa Cabanglasan, sa gipahigayon nga turn-over ceremony of Projects (assistance to farmers) ubos sa National Task Force to End Local Communist Armed Conflict (NTF-ELCAC) Support to Barangay Development Project (SBDP) nga programa sa nasudnong Pangagamhanan, kagahapong adlawa, Disyembre 22, 2021 sa Brgy. Mandahican, Cabanglasan, Bukidnon.

Sa 118 ka mga mag-uuma, 59 niini ang gikan sa Brgy. Mandahican nga gilangkuban sa Miaray-Calapan Farmers Association ug 59 usab ang gikan sa Brgy. Canangaan nga gilangkuban sa Umayamnon-Saloringan Farmers Association, Tumbaga-Tagbacan Farmers Association ug Umayamnon-Catablaranan Farmers Association, kinsa midawat ang matag usa kanila sa usa (1) ka bag nga hybrid corn seeds, usa (1) ka galloon nga herbicide, usa (1) ka litro nga foliar fertilizer ug unom (6) ka bag sa organic fertilizer. Samtang malipayong gidawat usab sa walo ( 8 ) ka mga farmer association ang tag-usa ka mga corn shellers nga ilang magamit aron mas mapadali ang ilang pagpanguma.

Gilauman usab nga modawat pa ang matag usa ka mag-uuma sa tulo (3) ka bag sa complete fertilizer, usa kabuok knapsack sprayer, usa ka baka, duha (2) ka kanding ug walo ( 8 ) ka packs sa assorted vegetable seeds. Kinatibuk-ang 4 milyones ka pesos ang gigahin nga pundo matag barangay alang sa assistance to farmers (Corn Production, Livestock Production ug Vegetable Production), samtang sa Agri-infra component (Multi-Purpose Drying Pavement o MPDP Warehouse) sa Barangay Canangaan mikabat kini sa 2.5 milyones ka pesos ug 10 milyones ka pesos usab alang sa Barangay Mandahican.

Lakip sa mitambong sa maong kalihukan mao sila si Ms. Glenda Hope A. Beley, LGOO VII nga nagrepresenta kang DILG Provincial Director Carmelo Enrique B. Libot, CESO V, provincial agriculturist Engr. Alson G. Quimba, Municipal Mayor Renante V. Inocando, Municipal Vice Mayor Lolita N. Obsioma, 1Lt. Angelo G. Patricio, Commanding Officer sa 88IB 4ID Phil. Army, kinsa parehong mipaabot sa ilang pagpahalipay ngadto sa mga benepisyaryo ug nagdasig nga ampingan nila kini, ipalambo ug gamiton gayud sa matarong aron mas mapauswag pa ang ilang panginabuhian sa umaabot nga panahon. Mitambong usab si Punong Barangay Ricky A. Ogade sa Barangay Mandahican ug Punong Barangay Monding M. Ogade sa Barangay Canangaan, ingon man ang ilang Municipal Agriculturist nga si Ms. Anita S. Macabugto.

###