Press Release No. 236 / December 23, 2021

MITUNOL ang Provincial Government of Bukidnon (PGB) sa pagkaong ayuda ngadto sa mga pamilyang apektado sa bagyong Odette nga mikalas ug kinabuhi ug midaot sa mga panimalay, agrikultura ug imprastraktura sa siyam (9) ka mga lungsod ug syudad sa lalawigan niadtong Disyembre 16, 2021.

Kinatibuk-ang 5, 428 ka mga pamilya ang natunolan sa relief distribution sama sa 25 kilo nga bugas ug usa (1) ka karton o 48 tins of can goods matag pamilya, pinaagi sa Provincial Social Welfare & Development Office (PSWDO) ug Provincial Disaster Risk Reduction & Management Division (PDRRMD). Mitala ngadto sa 2,485 ka pamilya ang natunolan ug hinabang sa Valencia City; 71 ka pamilya sa Cabanglasan; 26 ka pamilya sa Sumilao; 112 sa Impasugong; 133 ka pamilya sa Manolo Fortich; 71 ka pamilya sa Maramag; 395 ka pamilya sa Malaybalay City; 1,924 sa Malitbog; ug 211 sa lungsod sa Libona.

Sa situation report No. 6 nga gikan sa PDRRMD, as of December 21, 2021, miihap na sa 5,788 ka pamilya o 23, 497 ka indibidwal ang apektado sa kabangis sa bagyong Odette, kung aha duha (2) niini ang nakabsan sa kinabuhi ug tulo (3) ang samaran gumikan sa pagkahulog sa kahoy ug bato. Mikabat usab ngadto sa P138,674,500.00 ang gibana-bana nga cost of damage alang sa lifeline nga gilangkuban sa roads & bridges, electricity, water system ug flood control; 58 usab ka panimalay ang totally damage ug 56 ang partially damage o 21,935,500.00 milyones ka pesos ang damyos sa mga panimalay; P150,000.00 usab ang kinatibuk-ang damyos sa mga imprastraktura; samtang sobra kinse (15) milyones ka pesos ang damyos alang sa agrikultura sama sa humay, mais, prutas, lagotmon, mga utanon ug uban pang pananom.

Paningkamotan sa pangagamanang probinsyal, sa pagpanguna ni Governor Jose Ma. R. Zubiri, Jr., nga ipadayon ang pagtunol sa gikinahanglang tabang ug ayuda ngadto sa mga pamilya nga apektado sa bagyong Odette, ug gidasig usab ang katawhan nga kanunay’ng mag-ampo ilabi na niining umaabot nga kapaskuhan tungod kay kining tanan pagsulay ug lumalabay lamang.

###