Press Release No. 1 / January 4, 2022

NAGPABILIN ang Bukidnon nga ika-lima sa pinaka-labing adunahan nga probinsya sa tibuok nasud Pilipinas, basi sa bag-ong gipagawas nga 2020 Annual Financial Report sa Commission on Audit (COA) nga gisumite ni Michael G. Aguinadlo, ang Chairperson sa COA, ngadto kang President Rodrigo R. Duterte, pinetsahan Nobyembre 25, 2021.

Sa kasayuran gikan sa 2020 Annual Financial Report Local Government (Volume I) sa COA, ang Bukidnon nakasulod sa Top 10 Wealthiest Provinces in total assets, kung aha anaa kini sa ika-lima nga pwesto ug nakatala sa ₱18,557.83-billion pesos nga total assets. Mao na kini ang ikatulo nga higayon nga nahimong ikalima ang Bukidnon sa pinaka-labing adunahan nga probinsya sukad niadtong tuig 2018 diin nagtala kini sa ₱15.27-Billion nga total assets ug ₱18.294-Billion nga total assets sa tuig 2019.

Nakasulod sa Top-10 Wealthiest Provinces sa nasud alang sa 2020 ang mga mosunod nga probinsya: 1. Cebu nga adunay total assets nga ₱213,005.75-Billion; 2. Batangas- ₱25,236.43-Billion; 3. Rizal- ₱23, 053.49-Billion; 4. Davao de Oro- ₱20,891.42-Billion; 5. Bukidnon- ₱18,557.83-Billion; 6. Negros Occidental ₱17,170.11-Billion; 7. Isabela- ₱16,614.33-Billion; 8. Surigao del Norte- ₱15,787.49-Billion; 9. Palawan- ₱15,737.20-Billion; ug 10. Iloilo- ₱14,837.37-Billion.

Sa maong report, wala nahilakip ang probinsya sa Bukidnon sa Top-10 provinces nga adunay Highest Amount of Total Liabilities, nga pamatuod usab sa napagula nga joint certification sa mga opisina sa Provincial Budget, Provincial Accounting ug Provincial Treasurer niadtong Abril 26, 2021 nga ang Bukidnon walay loan obligation o outstanding loan sa bisan asa nga government o commercial bank sukad sa tuig 2016.

Mahinumduman nga ang probinsya sa Bukidnon gikonsidera nga usa sa pinakapobre nga probinsya sa tibuok nasud panahon sa unang paglingkod ni Governor Jose Ma. R. Zubiri, Jr. isip Gobernador, apan tungod sa pagpaningkamot sa iyang administrasyon, ilabi na ang iyang inisyatibo sa paghatag sa libreng abono ug binhi sa mais, humay ug binggala ngadto sa mga mag-uuma ug ang paghatag tabang pinansyal ngadto sa mga kabus pinaagi sa Aid to Individual/families in Crisis Situation (AIFCS), housing & resettlement projects, infrastructure projects, ingon man ang maayong pagdumala sa panalapi, nakab-ot sa probinsya kining maong kadungganan, uban sa suporta ug pakigtimbayayong sa mga miyembro sa Sangguniang Panlalawigan, City/Municipal mayors, mga empleyado ug ang katawhan sa Bukidnon.

Ang sumbanan (indicator) niini nga kalampusan mao ang total assets nga adunay tulo (3) ka mga component, nga mao ang mga mosunod: Current Assets—sama sa cash on hand, cash on bank, receivables ug investments; Property, Plant Equipment- nga mao ang mga fixed assets sa probinsya; ug ang Other Assets- kadtong mga kabtangan nga wala mahisakop sa nauna nga duha ka component.

###