Press Release No. 2 / January 5, 2022

GIDEKLARA sa Sangguniang Panlalawigan (SP) sa Bukidnon ang 88 anyos na nga Provincial Capitol Building isip Provincial Heritage Building, pinasikad sa giaprobahan nga Provincial Ordinance No. 2021-082R (26th SP), pinetsahan Setyembre 21, 2021, nga gi-endorso ni 2nd Legislative District board member Atty. Nemesio B. Beltran, Jr.

Natukod ang Provincial Capitol Building niadto pang tuig 1933 panahon sa pagpangatungdanan ni kanhi Governor Antonio Rubin ug gitukod pag-usab niadtong tuig 1946 pinaagi sa tabang sa Estados Unidos ubos sa Philippine Rehabilitation Act of 1946, diin gisumpayan ang balkonahi niini ibabaw sa main entrance, giilisan ang atop, ceiling ug dingding, apan gipabilin ang orihinal nga structural design, duha ka dagkong haligi sa main entrance, beams, flooring ug ang mga haligi niini gipalig-on sa puthaw.

Aduna nay 16 ka mga gobernador nga dinhi nag-opisina aron mangulo sa probinsya sukad sa katukuran sa maong gambalay niadtong tuig 1933 hangtud sa kasamtangan nga pagdumala ni Governor Jose Ma. R. Zubiri, Jr.

Napatik sa maong Ordinansa ang katukuran sa marker o ilhanan diha sa entrada nga haligi sa maong gambalay, isip pamatuod nga kini usa na ka provincial heritage building.

Ang Provincial Capitol Building nahimong saksi sa mga bililhong panghitabo ug kalampusan sa pangagamhanang probinsyal, gikan sa pag-ila niini isip usa sa mga pinakapobreng probinsya hangtud nga nahimo kini nga ika-lima sa pinaka-labing adunahang probinsya sa tibuok nasud.

Subay sa charter sa National Historical Commission of the Philippines (NHCP), ang edipisyo nga nagbarog sa dili mo-minus sa 50 ka tuig, angayan nga ediklara isip usa ka heritage building.

###