Press Release No. 3/ January 5, 2022

GI-AGHAT sa buhatan sa Persons with Disability Affairs Division (PGO-PDAD), pinaagi sa ilang hepe nga si Mr. Dominador Libayao, ang tanang interesadong registered Persons with Disability nga gustong mopahimulos sa libreng operasyon sa mga bata nga adunay kapansanan.

Bukas kini alang sa mga rehistradong PWDs nga nag edad 0 hangtud 17 anyos paubos ug gi-certify sa ilang tagsa-tagsa ka mga Local Social Welfare & Development Office (LSWDO) nga nahisakop sa kabus nga pamilya. Gipahimangnuan usab sila nga magdala sa ilang PWD ID ug ubanan sa ilang ginikanan/guardian sa pag-adto sa LSWDO alang sa hustong medical intervention ug screening kung kwalipikado ba sila nga mopahimulos niini. Ang listahan sa kwalipikadong PWD isumite gilayon sa LSWDO ngadto sa buhatan sa PDAD aron masumite usab kini ngadto sa Tebow CURE Hospital.

Lakip sa mga kondisyon nga pwedeng matambalan mao ang mga mosunod: Cleft Lip & Palate (mga bungi ug naay gisi sa ngala-ngala); Bowed Legs (mga batiis nga bakang ang porma); Constrictions sa batiis, tiil, bukton, kamot ug tudlo; Burns (mga paso nga wala matambalan); Clubfoot (tiil nga baliko ug hiwi ang porma); Knock knees (mga batiis nga kimpi ang porma); Hand Deformities; Prosthetic and Orthotics (mga brace ug artipisyal nga tiil); Broken Bones (nabali nga bukog gumikan sa aksidente).

Ang libreng operasyon gipaluyohan sa Tebow CURE Hospital ug bukas pa hangtud matapos ang tuig 2022 sa tinguha nga matabangan ang mga kabatan-onan nga adunay deperensya sa panglawas aron manimuyo ug mabuhi sila nga normal diha sa komunidad.

Alang sa dugang kasayuran ug mga pangutana, mamahimong mo contact ang si kinsa mang interesado sa mosunod nga mga numero sa Tebow CURE Hospital: 0931-734-9079/0922-662-0728/0910-111-3309 ug 0938-189-7883 alang sa Talk ‘n Text users; samtang sa Globe o TM users mamahimo sila nga mokontak sa numero 0945-598-9351/0977-636-7804 ug 0956-710-2000.

###