Press Release No. 4 / January 17, 2022

GIILA ug gipasidunggan sa Bureau of Local Government Finance (BLGF) ang mga National Top Performing Provinces, Cities and Municipalities sa Local Revenue Generation (LSR) alang sa Fiscal Year 2020, alayon sa opisyal nga pagpalugwa sa BLGF Memorandum Circular No. 031.2021 niadtong Disyembre 1, 2021.

Ang maong Memorandum Circular nag-ila sa mga paningkamot sa local nga kagamhanan sa nasud ngadto sa malungtarong pagtubo ug mas maayong serbisyo publiko sa natad sa pagtuman sa mandatu nga pagbuhis, sama sa real property tax, local business tax, ug uban pang matang sa bulohisan.

Sa Highest Nominal Locally Sourced Revenues sa tuig 2020, nahimutang ang Probinsya sa Bukidnon sa Number 8 spot sa Top 10 Provinces, sa kinatibuk-ang 81 ka mga probinsya sa nasud Pilipinas.

Subay sa nasangpit nga Memorandum Circular No. 031.2021, nag-una ang Probinsya sa Bulacan nga adunay LSR Collections nga ₱1,725.11 Billion; nagsunod ang probinsya sa Bataan – ₱1,594.26 Billion; Rizal – ₱1,538.85 Billion; Pampanga – ₱1,370.20 Billion; Quezon – ₱1,307.61 Billion; Batangas – ₱1,103.06 Billion; Iloilo – ₱995.39 Million; Bukidnon – ₱802.86 Million; Pangasinan – ₱796.23 Million; ug Cavite – ₱721.69 Million.

Gikalipay ni Provincial Governor Jose Ma. R. Zubiri, Jr. nga taliwala sa nasinati ug padayon nga gisagubang nga pandemyang hatud sa COVID-19, ang probinsya mapadayonon sa pagpangalagad ug napabiling anaa sulod sa Top 10 performing provinces, pinaagi sa atong Provincial Treasurer’s Office nga gipangunahan ni Provincial Treasurer Marilou S. Bueno, sa pakigtimbayayong sa Provincial Assessor’s Office nga gipangunahan usab ni Provincial Assessor Roger G. Guillermo, REA, REB, EnP.

Gumikan niini nga pag-ila sa BLGF sa paningkamot sa Local Government Units sa nasud, gipasalamatan sa amahan sa lalawigan, Governor Zubiri ang mga magbubuhis o taxpayers sa ilang pagsalig ug pagka-responsabling katawhan, pinaagi sa pakighiusa ug pagsanong sa panawagan nga dili gayud hikalimtan sa pagbayad ang ilang boluhisan aron malikayan ang mga multa ug uban pang mga penalties, subay sa Akta Republika Numero 7160. Usa kini ka indikasyon sa paglambo sa atong ekonomiya bisan pa man sa gi-atubang nato nga pandemya.

Kini na ang ikaduhang tuig nga anaa sa Top 10 performing provinces sa nasud ang Bukidnon, sa tuig 2019 ug 2020.

###