Press Release No. 7 / January 28, 2022

PADAYON sa Pangagamhanang Probinsyal sa Bukidnon, pinaagi sa Provincial Health Office (PHO) ang libreng pagpamakuna sugod kagahapong adlawa, Enero 27, 2022 sa alas alas 8:00 ang takna sa buntag ug magpadayon kini matag semana sa adlaw’ng Martes hangtud Biyernes diha luyo sa Centennial Stage, Kaamulan Park, Malaybalay City, Bukidnon.

Bukas kini alang sa nag-edad 12 hangtud 17 anyos ug 18 anyos pataas alang sa mag-first dose, 2nd dose (kadtong sa Centennial Stage gihapon nag-1st dose) ug booster shot. Ang nag edad 12-17 anyos kinahanglan ubanan sa ilang ginikanan/guardian ingon man sa pagdala sa ilang valid ID aron sa pag-ila sa ilang identity; birth certificate o ID sa bata ug kinahanglan anaa sa maayo nga panglawas ang kabataan nga ipaubos sa pagbakuna. Ang kadtong pedia (12-17 yrs old) nga adunay co-morbidity gikinahanglan nga magdala sa ilang medical certificate o pedia clearance gikan sa ilang pediatrician. Samtang sa adult population nga 18-anyos pataas, magdala lang sa valid ID o cedula.

Kini nga lakang gipanghingusgan sa probinsya, pinaagi ni Provincial Governor Jose Ma. R. Zubiri, Jr. aron mapakgang ang nagkataas nga kaso sa COVID-19 sa atong lalawigan sugod niining bulan sa Enero. Kahinumduman nga gi-awhag ni Gov. Zubiri ang katawhan sa makadaghan na nga higayon nga magpabakuna na gayud aron maproteksyonan sila niini nga virus.

Sa data gikan sa PHO, as of January 26, 2022, anaa pa sa 71.62% o 765,506 ka indibidwal ang fully vaccinated sa target population nga 1,068,778. Nag-una sa lima nga adunay pinakataas nga herd immunity ang lungsod sa Malitbog nga mitala na sa 93.31% coverage of fully vaccinated individuals; gisundan sa lungsod sa Sumilao nga mitala sa 89.35%; Manolo Fortich- 85.84%; Pangantucan- 83.51%; ug Baungon- 82.40%.

Gipahimangnuan usab ang tanan sa pagsunod sa minimum public health protocols sa Department of Health (DOH) sama sa pagsuot sa facemask, pagdala sa kaugalingong alcohol, ballpen, bottled water ug snacks/pagkaon, ilabi na niadtong mopahimulos sa libreng bakuna.

###