Press Release No. 8 / January 28, 2022

GISUPORTAHAN sa Bukidnon Police Provincial Office (BukPPO) ang gipagula nga Memorandum No. 418 ni Provincial Governor Jose Ma. R. Zubiri, Jr., pinetsahan Enero 17, 2022 nga nagmando sa istriktong implementasyon sa Section 5 ug 7 sa Executive Order No. 01 s. 2022.

Ang Section 5 sa E.O. No. 01 mao ang pag-inspeksyon sa gikinahanglang mga rekisitos alang sa inbound travelers ug returning residents, diin ang mga fully vaccinated gikinahanglang magpakita sa ilang vaccination card ug government issued ID nga adunay photo. Ang mga dili bakunado gikinahananglang magpresenta ug negative RT-PCR test result nga gikuha sulod sa 72 oras, samtang ang mga minor de edad dili na kinahanglan nga magpresenta sa negative RT-PCR test kung ang ilang guardian/ginikanan mga fully vaccinated na.

Samtang ang Section 7 sa maong kamanduan mao ang gipalabang nga mga protocols diha sa mga boarder control checkpoints sama sa pagpahigayon sa non-contact temperature check ug pag-obserbar sa Minimum Public Health Standards.

Sa pakighinabi kang PCol. Jun Mark J. Lagare, ang Provincial Director sa BukPPO sa programa nga “Isumbong Mo Kang Governor” kagahapon, dako ang iyang pagpasalamat ug suporta sa maong lakang sa gobernador aron masiguro nga ma-inspection pag-ayo ug mabantayan gayud ang mga byahero nga dili mosunod sa maong mando.

Gipaabot usab ni Mr. Hansel T. Echavez, ang Supervising Administrative Office ug anchorman sa maong programa, ngadto kang PCol Lagare ang mga kasinatian ug obserbasyon didto sa boarder control checkpoints sama sa kakulangon sa implementasyon sa gipalabang nga mando diin adunay mga byahero nga makasulod sa boarder bisan walay vaccination card, peke og dili mao ang impormasyon nga gibutang sa vaccination card ug adunay mga drivers nga walay lisensya. Kini nga kasayuran giila ni PCol Lagare ug nagbuhat na ug lakang nga madugangan pa ang mga personahi diha sa checkpoints aron mas mapahugtan pa ang ilang pag-inspection.

Ang maong memorandum, gipagula ni Gov. Zubiri aron hugtanong mapatuman ang implemetasyon sa mga COVID-19 protocols and guidelines ilabi na nga nagkataas ang kaso sa COVID-19 virus sa probinsya sa milabay nga mga semana.

###