Press Release No. 10 / February 2, 2022

KOMPLETO na nga naapod-apod ngadto sa baynte (20) ka mga lungsod ug duha (2) ka syudad sa probinsya ang libreng binhi ug abono sa mais gikan sa probinsya sa Bukidnon. niadtong Pebrero 1, 2022 ang pinakaulahing adlaw sa pagpaghatag sa mga personahi sa Provincial Agriculture Offfice (PAgrO), pinangulohan ni provincial agriculturist Engr. Alson G. Quimba.

Basi sa data gikan sa PAgrO, mokabat ngadto sa 414 milyones ka pesos ang gigahin nga pundo sa probinsya alang sa 60,000 ka mga farmer beneficiaries nga nahisakop sa poorest of the poor farmers ug na rehistro sa Provincial Farmers Information System diin nagtikad sa usa (1) o ubos nga ektarya. Matag usa ka mag-uuma midawat sa tag usa ka bag (9 kilos) nga hybrid corn seeds glyphosate-ready ug duha (2) ka bags sa 14-14-14 complete fertilizer o equivalent sa 6,900 pesos.

Ang pagpanghatag sa libreng binhi ug abono sa mais, usa ka tinuig nga programa sa probinsya sukad pa sa nilabay tuig 2013 ubos sa Economic Services nga gabayan sa maayong pagdumala sa amahan sa lalawigan, Governor Jose Ma. R. Zubiri, Jr. ubos sa suporta ug pakigtimbayayong sa Sangguniang Panlalawigan (SP) members sa panglantaw nga makaabag ug makatabang sa panginabuhi sa atong mga mag-uuma sa mais.

Si Governor Zubiri, kinsa personal gayud nga nagsuroy sa mga lungsod ug syudad atol sa maong pagpanghatag, nagpaabot sa iyang dakong pagpangga ug pagmahal ngadto sa tanang katawhan ilabi na sa atong mag-uuma sa mais nga walay laing pangita o panginabuhian panahon niining hagit sa pandemya.

Nagpahimangno usab si Engr. Quimba ngadto sa mga mag-uuma nga nga ampingan, atimanon ug ipalambo gayud nila ang ilang nadawat aron maka-sustiner sa ilang pagpanguma, ilabi na sa umaabot nga panahon.

###