Press Release No. 11 / February 3, 2022

MALAMPUSONG natunol ngadto sa mga mayor sa 20 ka lungsod sa probinsya ang 20 ka mga ambulansya, pinaagi sa Department of Health (DOH) ug ni Senate Majority Leader Juan Miguel “Migz” F. Zubiri, kaganihang buntag, Pebrero 3, 2022, pinaagi sa usa ka Blessing & Turn-over Ceremony atubangan sa Governor’s Office, Capitol Compound, Malaybalay City, Bukidnon.

“Importante kaayo kining mga ambulansya mga kaigsuonan para sa atong anti-covid response and of course para sa maayong panglawas sa atong mga katawhan sa Bukidnon nga nagkinahanglan ug mga emergency vehicles”, kini ang tipik sa pamahayag ni Sen. Migz, diin mapasalamaton usab siya nga natuman kining iyang gihandom nga programa para sa matag lungsod sa probinsya.

Gibutyag usab ni Dr. Jose R. Llacuna, Jr., DOH Regional Director, nga ang maong mga ambulansya kompleto sa mga ekipo alang sa paspas nga pag respondi sa mga emerhensiya, mopailalom sa hugot nga training ang mga personahi ingon man ang driver nga kinahanglan usab makakat-on sa mga basic life support aron makaabag sa pag respondi panahon sa emerhensya o katalagman.

Ang baynte (20) ka ambulansya nagkantidad sa 50 milyones ka pesos diin 2.5 milyones ang matag-usa niini, nga gipundohan ubos sa Health Facilities Enhancement Program sa Department of Health niadtong tuig 2021, pinaagi sa inisyatibo ug paningkamot ni Sen. Zubiri.

Mitambong sa maong talagsaong kalihukan si Governor Jose Ma. R. Zubiri, Jr., kinsa emosyonal nga nagpasalamat kang Sen. Migz nga wala gayud malimot sa pagtabang ngadto sa iyang gigikanang probinsya. Lakip usab nga mitambong sila si 3rd district Congressman Manuel “Manoy” F. Zubiri, 1st district Congresswoman Malou Acosta-Alba, SP Board Members, Dr. Vincent Raguro sa DOH-Bukidnon ug mga personahi sa DOH Region 10.

###