Press Release No. 12 / February 7, 2022

GIPAHIGAYON ang Oath Taking & Induction Ceremony sa bag-ong regular employees sa Provincial Government of Bukidnon (PGB) kaganihang buntag, Pebrero 7, 2022 atubangan sa Governor’s Office, Capitol, Compound, Malaybalay City, Bukidnon.

Kinatibuk-ang 1,582 ka empleyado sa PGB ang pormal nga nanumpa isip regular employees gikan sa job-order ug casual status, diin napatuman kini ubos sa mass regularization nga programa ni Governor Jose Ma. R. Zubiri, Jr. isip pagsuporta usab sa kampanya ni President Rodrigo R. Duterte nga end-of-contract o “endo”, ingon man tungod sa iyang dakong pagmahal sa tanang empleyado nga takos ug angayan lamang nga suklian sa ilang maayong pagpanerbisyo sa publiko.

Emosyal si Governor Zubiri nga mipaabot sa iyang dakong pagyukbo sa tanang empleyado nga nahimo niyang kaabag sa kalambuan sa probinsya, ilabi na ang kalampusan nga nakab-ot gikan sa usa sa pinakapobre nga probinsya hangtud naila kini nga ikalima sa pinakalabing-adunahan nga probinsya sa tibuok nasud.

Mahinumduman nga una nang gisugdan ni Governor Zubiri ang iyang programa niadtong tuig 2010 diin 227 ka mga empleyado ang nahimong permanent gikan sa casual status; sa tuig 2017, 212 ang nahimong casual gikan sa job order status ug 647 usab ang nahimong permanent gikan sa casual status.

Mipailalom sa makuti nga recruitment & selection process ang maong mga empleyado ug gisiguro nga sila padayong nagtrabaho as of May 31, 2021 ug adunay at least satisfactory to very satisfactory performance, wala nag-atubang ug administrative or disciplinary cases ubos sa polisiya sa civil service, PGB o sa ilang opisina ug gi-endorso sa ilang tagsa-tagsa ka heads of offices, chief of hospitals, division chiefs ug section heads.

Sa pakighinabi ngadto kang Ms. Aida B. Loveres, ang Provincial Human Resource Management Officer sa probinsya, iyang gipanghinaot nga mas magkugi pa sila sa ilahang pagtrabaho karon nga usa na sila ka regular employee sa ilang tagsa-tagsa ka opisina ug mosunod sa gitakda nga mga polisiya sa CSC ug sa PGB.

###