Press Release No. 14 / February 11, 2022

KALIPAY nga hilabihan ang makita sa panagway sa katawhan nga maka-benepisyo sa katukoran sa Level II Potable Water System sa Sitio Kabagtukan, Barangay Hagpa, Impasugong, Bukidnon, human nga hingpit napahigayon ang Turnover and Acceptance Ceremony niini niadtong Pebrero 9, 2022 nga gipangunahan sa mga ahensyang nasyunal, probinsyal, municipal ug sa barangay.

Sa testimonya nga gihatag ni Datu Anaclito Sagula, kinsa mao ang Indigenous People Mandatory Representative (IPMR) sa Higaonon Tribe sa Barangay Hagpa, Impasugong, gipadayag niini kung unsa kabililhon ang maong proyekto sa ilang pangunabuhi nga anaa sa hilit na nga dapit sa Bukidnon, ilabi na kanila sa IP community, ug sa unsang paagi kining maong proyektoha makahatag ug malungtarong kalinaw ug kalamboan ingon man dakong suporta sa ilang kahimtang sa pagpuyo.

Samtang gikalipay ni Punong Barangay Eder H. Suday ang hingpit nga katumanan sa dugay na nilang gihandum nga kaugalingong water system nga mi-agi gayud sa makuti nga proseso. Dakong pagpasalamat usab niini sa kagamhanang probinsyal ug sa lungsod sa Impasugong sa kanunay nga pagsusi ug pag-agak sa panginahanglan sa ilang barangay.

Alayon niini, mapasigarbuhon ug gidayeg DILG X Regional Director Arnel M. Agabe, CESO III ang Provincial Government of Bukidnon, pinaagi sa Provincial Engineer’s Office sa nahimong accomplishment niini tungod kay dinhi sa Bukidnon ang natala nga unang nakahuman sa pagpatuman sa Local Government Support Fund – Support to Barangay Development Program (LGSF-SBDP) sa tibuok Rehiyon X.

Base sa data sa DILG, Disyembre 14, 2021 ang Notice to Proceed sa maong proyekto sa patubig ug nahuman kini Enero 16, 2022, diin nahimong contractor niini ang Gimpab Enterprises. Dul-an sa usa ka milyon ka pesos ang kantidad sa nasangpit nga proyekto nga naglakip sa construction sa 1-unit intake box, pagplastar sa pipelines ug pagmontar sa steel tank reservoir with complete accessories kung aha maka-benepisyo niini ang 45 ka bubong sa mga panimalay 0 270 population.

Ang Barangay Hagpa, Impasugong adunay 20-milyones ka pesos nga kantidad nga gitagana gikan sa LGSF-SBDP alang sa proyekto sa water system, school building ug local access road rehabilitation / improvement.

Isip representante ni Governor Jose Ma. R. Zubiri, Jr., gipaabot ni Board Member Lorenzo L. Dinlayan, Jr. sa 2nd District Legislative sa Bukidnon ang dakong kalipay sa gobernador tungod kay dako na kaayo kini ug kontribusyon nga maghatag ug kausbawan sa panginabuhi sa katawhan.

###