Press Release No. 16 / February 13, 2022

GIKAHINAMAN ang subling pagsaulog sa tinuig nga Kaamulan Festival sa Probinsya sa Bukidnon alang ning tuig 2022, human nga wala kini mapahigayon sa milabay’ng duha ka tuig, 2020 ug 2021, gumikan sa hulga nga dala sa COVID-19 pandemic sa dihang gipaubos ang tibuok nasud Pilipinas sa health emergency.

Giklaro ni acting provincial administrator ug provincial legal officer Atty. Paul Vincent G. Villegas atol sa Kaamulan 2022 Committee Meeting niadtong Pebrero 10, 2022 nga ipahigayon ang Kaamulan 2022 sa kondisyon nga limitado ang mga kalihukan o mga activities, kung aha minimal lang ang pagtapok sa mga partisipante gikan sa 22 ka mga local government units sa probinsya, gikan sa Marso 23 hangtud sa Abril 23, 2022.

Pipila sa mga kalihukan nga adunay panugot nga ipahigayon karong tuig mao ang mosunod: Laga Ta Bukidnon; Culture and the Arts Exhibit; Piniliyapan Hu Bukidnon, Documentation & Virtual Presentations; Ethnic Rituals; Ethno Cultural Festival; Kaamulan Marathon; Kaamulan Tennis Tournament; ug Kaamulan Dart Tournament.

Hinuon, giklaro ni Atty. Villegas nga kining tanan mag-depende sa Alert Level System Classification sa Bukidnon gikan sa National Inter-Agency Task Force, kung aha naka-angkla usab ang mamahimong basehan o gabayan sa mamahimong protocols sa pagpahigayon sa mga kalihukan. Sa kasamtangan, anaa sa Alert Level System No. 3 ang lalawigan ug gipanghinaut nga moubos pa kini aron nga mas daghan usab ang makasaksi ug makapartisipar sa tinuig nga kasaulogan.

Pinasikad sa Provincial Ordinance No. 2007-003r(10th SP) nakatakda dinhi nga angayang mapahigayon matag tuig ang Kaamulan gikan sa Marso 23 ngadto sa Abril 23, nga posebling mapalapdan sa pagbuot sa provincial governor, hinuon, gitugutan usab nga mabalhin ang schedule sa panagtapok ngadto sa lain nga yugto sa panahon base sa usa ka makatarunganon nga rason, sama sa apan dili limitado sa dili kalikayan nga mga panghitabo.

Ang Kaamulan usa ka Ethnic Festival sa Bukidnon nga nagpakita sa abundang kostumbre ug tradisyon, mga kulturanhong pagkinabuhi sa pito niini ka tribu nga gilangkuban sa Bukidnon, Manobo, Matigsalug, Higa-onon, Umayamnon, Talaandig ug Tigwahanon.

###