Press Release No. 18 / February 14, 2022

PAGASUGDAN na ugmang adlawa, Pebrero 15, 2022 ang evaluation sa Lupong Tagapamayapa Incentives Award (LTIA) sa tuig 2022 alang sa mga naduso nga barangay sa 20 ka lungsod ug duha (2) ka syudad sa probinsya sa pagpanguna sa Department of the Interior and Local Government (DILG).

Kauban sa DILG ang mga miyembro sa evaluation team nga gikan sa Liga ng mga Barangay, Provincial Legal Office, Bukidnon Provincial Police Office, Provincial Prosecutors Office, PGO-Public Affairs, Information & Assistance Division, Provincial Budget Office, ug Hineleban Foundation nga usa ka Non-Government Organization.

Ang nasangpit nga evaluation team mao ang gitahasan nga maglantaw ug magsusi sa tanang dokumento sa napiling barangay sa matag lungsod ug syudad subay sa lima (5) ka mga sumbanan nga mao ang Efficiency of Operations, Effectiveness in Securing the Settlement of Interpersonal Dispute Objective of the Katarungang Pambarangay, Creativity and Resourcefulness of the Lupong Tagapamayapa, Area or Facility for KP activities ug Financial and Non-Financial Support.

Mahinumduman nga nahimong mananaog alang sa 1st-3rd class municipality category sa 2021 LTIA ang Barangay San Jose, San Fernando, gisundan sa Barangay Spring, Kibawe ug Butong, Quezon; Samtang sa City Category, nakuha sa Brgy. Magsaysay, Malaybalay City ang 1st place ug nakuha usab sa Brgy. San Carlos, Valencia City ang 2nd place.

Isip pagsunod sa gipatuman nga minimum public health protocol sa Department of Health (DOH), una nang gipahibalo sa DILG ang tanang nominadong barangay nga sa covered court o sa multi-purpose hall ipahigayon ang evaluation kung aha open-air kini, ang tanang dokumento isiguro nga nakahan-ay na sa lamesa aron dali kining masusi sa mga evaluators ug ang Punong Barangay, Barangay Secretary, Barangay Treasurer ug lima (5) ka Lupon members lamang ang giimbita aron ma-obserba ang social distancing.

###