Press Release No. 22 / February 15, 2022

NAGPABILING estriktong gipatuman ang napalabang nga balaod sa 26th Sangguniang Panlalawigan nga Provincial Ordinance No. 2021-062R o mas naila nga African Swine Fever (ASF) Prevention Ordinance in Bukidnon nga napalabang niadtong Hunyo 8, 2021 aron mapabiling ASF Free ang Probinsya sa Bukidnon.

Kini ang nahimong basehan sa mga personahe sa Provincial Veterinary Office (PVO) diha sa 13 ka mga Provincial Veterinary Sanitation Checkpoints ingon man ang Executive Order No. 35 ni Provincial Governor Jose Ma. R. Zubiri Jr. nga temporaryong nagdili sa pagpasulod sa mga binuhing baboy, karneng baboy ug mga produkto nga gama sa karneng baboy nga naggikan sa kasikbit nga mga probinsya niini sa tibuok nasud.

Nasayran nga tumong sa maong Ordinansa nga makamugna ug mga lig-ong sukaranan sa mamahimong gabayan sa pagpatuman sa balaod batok sa ASF, sanglit giprotektahan karon sa Department of Agriculture ang Bukidnon sa rason nga usa kini sa mga nahibiling supplier sa karneng baboy nga gikunsiderang green zone o walay kaso sa ASF.

Nakatakda sa maong Ordinansa ang mga silot ug multa niadtong makalapas niini nga balaod sa Bukidnon, pinaagi sa pagkumpiska sa mga ginadili nga mga items ug sa pagpahamtang sa dili molapas sa 5,000 pesos nga multa. Ang makumpiskang baboy o produktong gama sa karneng baboy kinahanglang dinalian nga ma-dispatsa sa hingtungdang LGU pinaagi sa supervision sa PVO sa pakig-koordinar sa Bureau of Animal Industry (BAI) ug DA.

Hugtanon usab nga gidasig sa “Bantay ASF sa Barangay Program” ang pagdili sa pagbahog sa mga pasaw ngadto sa binuhing baboy.

Ang Provincial Veterinary Sanitation Checkpoints sa Bukidnon anaa nahimutang sa sa Alae, Piligayon, ug Mantibugao sa Manolo Fortich; Nicdao, Baungon; Gango, Libona; Sta. Inez, Malitbog; San Isidro, Talakag; Lorega, Kitaotao; Omonay, Damulog; Pamotolon, Kalilangan; Bonacao, San Fernando; Cabalantian, Kitatao ug Sitio Forchacu, Malinao, Kalilangan.

###