Press Release No. 20 / February 15, 2022

“Mga palangga ko, nalipay ko’g dako nga bisan tinuod katapusan ko ni nga pagserbisyo isip gobernador sa atong probinsya, anaa gihapon kita nga mapabilin nga mga programa para sa katawhan sama niini, labi na gyud sa atong mga igsoon nga mga kabus. Mapasalamaton kita sa kahitas-an nga gitagaan kita ug grasya dinhi sa kabukiran.”

Kini ang tipik sa mensahe ni Provincial Governor Jose Ma. R. Zubiri, Jr. atol sa pagpanguna niini sa gipahigayon nga Groundbreaking Ceremony sa 50 ka mga housing units sa Sumilao Paglaum Village II nga ipahimutang sa Purok 2, Barangay Poblacion, Sumilao, Bukidnon kaganihang buntag-Pebreo 15, 2022.

Ang maong proyekto pagapondohan sa sobra 16 milyones ka pesos sa Provincial Government of Bukidnon samtang ang luna nga duha ka ektarya nga residential land gidonar sa pamilya ni Municipal Mayor Jose Antonio Villo alang sa katawhan sa lungsod sa Sumilao kung aha mapabarug ang 50 ka mga housing units alang sa mga homeless nga residente sa maong lungsod. Adunay 30 square meters ang area sa matag housing unit, adunay duha ka kwarto ug 1 ka toilet/bathroom sa kantidad nga 330,000 pesos kada balay.

“Thank you for giving the poor people the chance to live in a decent home. That is something that God will never forget of you because of what you’ve done for poor and the poorest among the poor.” -Polong nga gipadangat ni Governor Zubiri ngadto kang Mayor Villo gumikan sa paningkamot niini nga mahatagan ug katumanan ang dugay na nga pangandoy sa katawhan nga makapuyo sa desinte nga panimalay.

Gibatbat usab ni Mayor Villo ang mga napatukod ug gipondohang proyekto sa Provincial Government sa iyang lungsod gawas sa gipahigayon nga housing projects, anaa usab ang proyekto sa municipal building, market building, market stall, food court, public terminal, ingon man sa kadalanan diha sa iyang lungsod.

Sa wala pa hingpit matapos ang programa, ang 50 ka housing units gilauman nga dugangan ni Governor Zubiri ug laing 50 alang sa pinakapobre nga katawhan sa Sumilao, Bukidnon, pinasikad sa gabayan sa maayong pagdumala niini ubos sa Health and Social Services.

###