Press Release No. 25 / February 16, 2022

GITUNOL sa mga implementers o tigpatuman sa Local Government Support Fund – Support to Barangay Development Program (LGSF-SBDP) ngadto sa 59 ka mga beneficiaries ang 59 ka mga baka isip dugang hinabang gikan sa gobyerno, nonot sa gihimong Turnover Ceremony sa Cattle Multiplier Farm, kagahapon, Pebrero 17, 2022.

Ang mga beneficiaries nasakop sa Tagbacan-Tumbaga Farmers Association (20 members); Umayamnon-Catablaran Farmers Association (20 members); ug ang Umayamnon-Saluringan Farmers Association (19 members).

Kini kabahin sa ₱4 million nga Assistance to Farmers Project nga gilangkuban sa corn production, livestock and poultry production, ug vegetable production. Mahinumduman nga naona na nga nadawat sa nasangpit benepisyaryo niadtong Disyembre 22, 2021 ang nagkalain-laing farm inputs, sama sa 59 bags hybrid corn seeds, 354 bags sa organic fertilizer, 59 galloon sa herbicide, 472 packs sa assorted vegetable seeds ug 59 ka knapsack sprayers. Gilauman nga sa dili madugay, matunol na usab kanila ang 80 heads sa kanding, 7 ka kabayo, 188 bags sa phosphate fertilizer ug 59 bags sa urea.

Gipaabot ni Engr. Carmelo Enrique B. Libot, CESO V, provincial director sa DILG-Bukidnon nga ang maong kalampusan usa ka pagpamatuod nga ang tibuok gobyerno, gikan sa national, provincial, municipal ug barangay governments, nagkahiusa aron tabangan ang mga naapektuhan sa armadong pakigbisog, pinasikad sa Executive Order No. 70 o whole of nation approach ni Presidente Rodrigo Duterte diin naka-angkla ang NTF-End Local Communist Armed Conflict.

Isip natahasan sa pagpatuman sa nasangpit nga proyekto sa kagamhanan, gipanghinaut ni provincial agriculturist Engr. Alson G. Quimba nga ampingan ug palambuon ang programa uban sa pagdasig nga paningkamotan nga mapabilin ang ilang panaghiusa alang sa malinawon nga pagpanginabuhi uban sa ilang pamilya.

Ang Barangay Canangaan, Cabanglasan adunay kinatibuk-ang 20-milyones ka pesos nga pondo gikan sa LGSF-SBDP sa tuig 2021 nga nakatagana alang sa agri-infra component projects, infrastructure projects ug ang natumbok nga assistance to farmers projects.

###