Press Release No. 23 / February 16, 2022

HINIUSANG gipangunahan sa Provincial Government of Bukidnon, LGU-Manolo Fortich ug sa Department of Public Works and Highways – 3rd District Engineering Office (DPWH-3DEO) ang Groundbreaking Ceremony sa 80-Houses sa Alae Paglaum Village sa Barangay Alae, Manolo Fortich, Bukidnon, kaganihang buntag-Pebrero 16, 2022.

Ang maong partnership project usa ka ilhanan sa lig-on nga panagtimbayayong sa lokal nga kagamhanan ug sa nasudnong ahensya sa gobyerno sa ngalan sa pagserbisyo sa katawhan, diin gitubag sa Provincial Government of Bukidnon ang panginahanglang solusyon sa problema lokal nga kagamhanan sa Manolo Fortich kabahin sa mga pamilya sa informal settlers nga nahiluna sa gi-abandona nga national highway sa Barangay Alae sa maong lungsod sa pipila na ka dekada, sanglit haom usab kini sa Health and Social Services nga gabayan sa maayong pagdumala sa provincial local chief executive.

Pinaagi ni Provincial Governor Jose Ma. R. Zubiri, Jr., gipangitaan kini ug paagi nga makalikom ug pondo nga sobra 26 milyones ka pesos, sibo sa pagatukorong 80 ka mga kabalayan aron maplastar ang maong mga pamilya ug malikayan ang kagubot. Ang matag housing unit magkantidad sa 330,000 pesos alang sa 100 square meter nga average lot area diin 30 square meter ang mamahimong average floor area niini.

Sa sobra tulo ka ektarya nga land area sa DPWH, nasabutan nga gamiton ang sobra usa ka ektarya alang sa DPWH 3rd District Engineering Office Motorpool samtang ang lain pang duha ka ektarya alang sa pagatukoron nga relocation site, isip donasyon sa katawhang nanginahanglan.

Miagi sa makuti nga proseso ang nasangpit nga paghusay o coordination meetings kaniadtong unang bahin sa tuig 2021 nga gipangunahan ni kanhi provincial administrator Atty. Jay S. Albarece, kinsa mao ang gitahasan ni Governor Zubiri sa pagsusi sa maong kahimtang sa mga kabus nga pamilya sa area sa Barangay Alae kauban sila Manolo Fortich Mayor Clive D. Quiňo ug sa mga kadagkoan sa DPWH-3rd DEO.

Ang implementasyon sa maong proyekto sugdan ning bulan sa Pebrero 2022 ug nakatakdang ma turnover sa Hunyo 2022.

###