Press Release No. 29 / February 22, 2022

ISTRIKTONG gibantayan sa Provincial Government of Bukidnon (PGB), pinaagi sa Provincial Health Office uban sa tanang lokal nga kagamhanan sa lalawigan nga masunod ang hustong pagdumala sa mga health care wastes sa tanang pasilidad sa panglawas, community quarantine units ug mga temporary treatment and monitoring facilities nga adunay kaso sa Coronavirus Disease 2019 (COVID-19), diin naga-monitor niini ang Environmental and Occupational Health Units sa Provincial, City ug Municipal Health Office.

Nagpagula ang DOH sa mga Memorandum uban sa DENR ug DILG sa Interim Guidelines aron malikayan ang mga risgo o kakuyaw kung walay proper management disposal. Sigun ni Engr. Florissa L. Adviento sa Environmental and Occupational Health and Safety Unit sa PHO, ang mga waste disposal sa tanang lugar sa health facility gasunod sa istriktong proseso tungod kay delikado kini sa panglawas ug sa palibot sa komunidad.

Pagtin-aw usab ni Nurse Jennifer Malazarte sa PHO nga ang COVID-19 vaccine vials waste moagi ug imbentaryo, bag-o kini iputos sa ziplock nga plastic 20 kada pakete, samtang ang mga nagamit nga vaccine syringes uban sa mga nagamit nga dagom ga-ibutang kini sa Safety Collector Box nga naka selyo, ayha ibutang sa sako ug andam na ihatud sa Department of Health Regional Office alang sa proseso sa tukmang disposal. Samtang ang tanan mga hazardous wastes sa mga ospital, susama sa Bukidnon Provincial Medical Center (BPMC), gipahimutang kini sa mga septic vault nga nakatukod sa sulod mismo sa ilang mga tambalanan. Ang tanang biodegradable nga mga basura lamang ang pagadad-on sa mga designated landfill sa matag munisipyo/syudad ka-usa sa usa ka semana.

###