Press Release No. 32 / February 23, 2022

GIPAHIGAYON ang pinaka-unang Bukidnon Tribal Youth Summit sa mga kabataang Indigenous Peoples’ (IPs) gikan sa pito (7) ka tribu nga Bukidnon Tribal Youth Ambassadors (BTYA) sa probinsya, kagahapon-Pebrero 22, 2022 hangtud karong adlawa-Pebrero 23, 2022 sa Kaamulan Open Theatre, Malaybalay City.

Ang maong summit gipartisipahan sa mga kabataang IPs gikan lungsod sa San Fernando, Cabanglasan, Kalilangan, Don Carlos, Libona, Maramag, Kadingilan, Kibawe, Kitaotao, Malaybalay City, Sumilao, Damulog, Pangantucan, Dangcagan, Quezon ug Valencia City, kinsa nag-edad sa 15-18 anyos pataas gikan sa tribung Bukidnon, Higaunon, Talaandig, Manobo, Matigsalug, Tigwahanun ug Umayamnun, diin nakatambong usab si Congressman Manuel “Manoy” Zubiri isip dinapit nga bisita ug mamomolong.

Sumala ni BTYA President Ahdel Lantag Agsinao uban sa iyang Vice President nga si Lovely Jean Bagna, tinguha sa maong kalihukan nga matabangan ang mga kabatan-onan sa ilang mga nag-onang problema o kabalaka diha sa matag barangay, ilabi na sa problema sa pag-eskwela, financial assistance, scholarship, livelihood, ug employment labi na karong panahon sa pandemya.

Ang grupo boluntaryong nagasuroy sa tibuok probinsya sukad niadtong Oktobre 5, 2012, diin napadangat usab nila ang mga nalikom nga mga problema ug kabalaka sa kabatan-onan ug nahatagan sa tukmang aksyon, pinaagi sa pagdangop sa mga programa sa nagkalain-laing ahensya sa gobyerno, ingon man sa provincial ug municipal governments.

Anaa sa unom (6) lamang ka miyembro kaniadto sa dihang nagsugod ang BTYA, kinsa nahatagan usab ug suporta ni Governor Jose Ma. R. Zubiri, Jr. isip mga job order employees sa kagamhanang probinsyal niadtong tuig 2018. Sa maong tabang gikan sa Provincial Government, inisyatiba sa grupo nga tigumon ang ilang sweldo ug gitagana sa pagsuporta sa pagtungha sa unom ka mga kabataang IPs hangtud kini nakalampos. Sa kasamtangan, aduna nay 15 ka eskolar ang Bukidnon Tribal Youth Ambassadors pinaagi sa pag-abag sa Provincial Government of Bukidnon.

Ang maong hugpong sa kabataan nahimong lehitimong miyembro sa Provincial Youth Development Council ug accredited usab sa Sangguniang Panlalawigan, sanglit nakarehistro na sila sa DOLE niadtong Agosto 5, 2014 ug sa tuig 2014 sa Securities and Exchange Commission.

###