Press Release No. 33/ February 24, 2022

GILAUMAN nga mahimong sukaranan sa pagsikad sa ekonomikanhong kalihukan sa Barangay Kulasihan, Lantapan ang hingpit nga pagtunol sa solar and mechanical dryer ug hauling truck ngadto kang Bugcaon Kulasihan Manupali Irrigators’ Association, Inc. (BUKUMA IA) President Solomon L. Omo, niadtong Pebrero 23, 2022.

Sa gipahigayon nga Turnover Ceremony, gipaabot ni provincial agriculturist Engr. Alson G. Quimba ang mensahe nga kanunay naka-alalay ang gobyerno sa panginahanglan sa katawhan aron mahimong kaabag sa pagpalambo ug makab-ot ang gilaraw nga makamugna ug igong supply sa pagkaon. Giklaro usab ni Regional Technical Director Carmelita T. Bajarla sa Department of Agriculture Region X nga pinaagi sa maong kalihukan, nagtimaan kini sa makanunayon nga koordinasyon tali sa ahensya sa gobyerno ug sa lokal nga kagamhanan sa hiniusa nga tinguha aron mahatagan ang komunidad sa tabang panginabuhian nga ilang gikinahanglan.

Kini usa ka partnership project sa DA X ug sa Provincial Government of Bukidnon, nga adunay kinatibuk-ang budget allocation ₱2,703,722.37. Sa maong kantidad, ₱1,712,512.99 ang gikan sa Philippine Rural Development Project (PRDP), ₱428,128.25 gikan sa Provincial Government of Bukidnon ug ₱563,081.13 ang in kind equity gikan sa BUKUMA IA nga mao ang area nga gitukoran sa proyekto alang sa giaprubahang produkto nga Fermented Dried Cacao Beans Processing & Marketing. Mikabat sa ₱705,453.24 ang balor sa 1 unit solar and mechanical dryer facility ug ₱1,435,188.00 usab ang kantidad sa 1 unit hauling/delivery truck.

Sa tibuok nasud, ang BUKUMA IA lang ang ikaduha nang naaprubahan sa PRDP alang sa gisugyot nga proyekto, human nga naona nang nakadawat sa 29 ka units sa tractor ang maong asosasyon, ilhanan sa ilang makugihon nga pag-proseso sa gikinahanglang rekisitos.

Gipasalamatan ni Mayor Ernie Devibar sa Lantapan, Bukidnon ang lain na usab nga proyektong gibubo sa iyang lungsod gikan sa nagpakabanang gobyerno, pinaagi sa DA X ug sa Kagamhanang Probinsyal. Pahimangno ni Mayor Devibar sa 38 ka mga miyembro sa BUKUMA IA nga ampingan gayud ang mga pasilidad ug ekipo nga gisalig dinha kanila aron mahimong instrumento nga makabaton ug kausaban ang ilang pangunabuhian.

Ang PRDP usa ka national project ubos sa Department of Agriculture nga nagtumong sa pagtukod ug moderno, value-chain oriented, ug climate resilient nga sektor sa agrikultura ug pangisda. Kini hiniusang gipondohan sa World Bank, National Government ug Local Government Units (LGUs).

###