Press Release No. 34 / February 24, 2022

NAGPAMATUOD sa tinud-anay ug padayon nga suporta sa gobyerno sa mga Former Rebels (FRs) ang gipahigayon nga Awarding Ceremony of Certificate of Entitlement to 16 FRs with House and Lot Allocations sa AFP-PNP Pine Ville Housing Project sa Barangay San Jose, Malaybalay City, kaganihang buntag-Pebrero 24, 2022 sa 88th Infantry Batallion, South Poblacion, Maramag, Bukidnon.

Sumala ni provincial director Engr. Carmelo Enrique B. Libot, CESO V sa DILG-Bukidnon Provincial Office nga kanunay’ng andam ang gobyerno nga mopahimutang ug ensakto sa mga FRs, agig pagsunod sa direktiba sa presidente sa nasud. Gipanghinaut ni PD Libot nga maningkamot sila nga molahutay ug magmalampuson uban sa pag-abag sa kagamhanan.

Sa maong okasyon, gipahimuslan ni PD Libot ang oportunidad nga makapadangat sa iyang dakong pagpasalamat sa Provincial Government of Bukidnon, ubos sa liderato ni Governor Jose Ma. R. Zubiri, Jr. sa gitunol niining hinabang sa mga naona na nga FRs kinsa malinawon na usab nga nanimuyo sa maong housing project.

Ang AFP-PNP Pine Ville Housing Project nga gidumala sa National Housing Authority (NHA) Region X, adunay kinatibuk-ang 250 housing units, diin sa maong gidaghanon na-turnover na ang 137 ug naka-okupa na usab dinhi ang 94 ka mga FRs. Ang matag housing unit nagkantidad sa ₱450,000 sa sukod nga 40 square meters nga lot area, 22 square meters nga floor area ug dugang 12 square meters loft.

Gidasig ni district manager Engr. Madeline Gilda S. Abellera sa Bukidnon, Misamis Occidental, Lanao del Norte area sa NHA Region 10 ang mga FRs nga karon nga sila na ang legal nga nanag-iya sa housing unit, hinaut nga ila kining panga-on ug ampingan. Dugang pahayag niini nga gihatagan gayud sila ug importansya sa gobyerno, pinaagi sa EO No. 70 ni Presidente Rodrigo Roa Duterte nga nagmandu sa tanang ahensya sa gobyerno nga magtinabanga ug dili pasagdan ang mga FRs.

Sa Region X, ang Bukidnon Provincial E-CLIP ang unang nakapatuman sa housing project nga gipuy-an na gyud sa mga FRs.

Gisiguro usab ni BGen Ferdinand T. Barandon, commander sa 403rd Infantry Brigade nga padayon ang panaghiusa sa tanang ahensya sa gobyerno alang sa pagpauswag sa kalinaw ug kalamboan sa nasud.

###