Press Release No. 37 / March 1, 2022

GIPASABOT sa Provincial Government of Bukinon (PGB) kung unsa kamahinungdanon ang hingpit nga kalampusan sa pagkab-ot sa gitakda nga Herd Immunity Coverage sa lalawigan, pinaagi sa naandan nga tulomanon sa Isumbong Mo Kang Governor kaganihang buntag-Marso 1, 2022, usa kini ka radio program sa kagamhanang probinsyal nga gidumala sa PGO-Public Affairs, Information and Assistance (PAIA) nga gipangunahan ni Supervising Administrative Officer Hansel T. Echavez, nahinabe niini si provincial health officer Dr. Gary Guido C. Tabios, Jr. kung aha gibutyag niini nga importante nga maabot na sa probinsya ang 70% herd immunity coverage aron hinay-hinay usab nga makalawig padulong sa new normal o ang panahon nga wala nay restrictions, gawas sa basic health protocols sama sa pagsuot sa face mask, pagmentina sa social distancing ug ang kanunay nga paghugas sa kamot.

Sa data gikan sa Provincial Health Office (PHO), ang kasamtangan nga Herd Immunity Coverage sa tibuok probinsya, Marso 1, 2022 sa alas 8 sa buntag, anaa sa 67.62% o 834,504 ang hingpit nga nabakunahan gikan sa 1,234,035 nga target population. Anaa usab sa 874,579 ang nakakuha na sa ilang 1st dose samtang miihap na usab sa 8.46% o 70,567 ang nakakuha na sa booster dose.

Sa managlahing pakisayud ngadto kang Ms. Jennifer A. Malazarte, Nurse III sa PHO, gipahayag niini nga 70% sa total target population ang basehan sa COVID-19 alert system ug 80% alang sa senior citizen nga kinahanglang fully vaccinated aron makatigayon sa pag-os-os ang classification sa usa ka lugar o probinsya.

Sa Provincial Pediatric (12-17 anyos) vaccination coverage, adunay target population nga 179,382, kung aha anaa na sa 80.04% o 142,577 ka mga kabataan sa maong age group ang fully vaccinated, samtang sa 5-11 years old age group nga gisugdan sa pagbakuna niadtong Pebrero 14, 2022, anaa sa 8,825 ang nakakuha na sa 1st dose alang sa target population nga 222,324.

Nagkadaiyang pang-engganya sa katawhan ang gihimo karon sa mga lokal nga kagamhanan sa Bukidnon aron gayud nga mabakunahan ang mga residente niini, sama sa panghatag ug ayuda nga bugas, libre snack ug lunch, libre hatud ug ang uban mohatag sa pamasahe aron maka-adto sa vaccination centers. Gawas niini, nagapahigayon usab sila sa mobile vaccination gamit ang mga ambulansya.

Regular ang vaccination schedule sa tanang LGUs gikan sa Lunes hangtud sa Biyernes, lakip dinhi sa Centennial Stage, Kaamulan Park, Malaybalay City, gawas lamang kung adunay laing kalihukan nga dinhi ipahigayon.

###