Press Release No. 40 / March 2, 2022

KINASING-KASING nga gipasalamatan ni Provincial Governor Jose Ma. R. Zubiri, Jr. ang mga personahe sa Bureau of Fire Protection (BFP)-Bukidnon nga gipangunahan ni Supt. Rafonzel F. Anito, ang Provincial Fire Director gumikan sa maayong pagpangalagad niini sa katawhan sa Bukidnon.

“…of all departments nga makaangkon nga sila the best, kamo ra gyud. Sa 18 ka tuig ko nga nagserbisyo, wala gyud kamo magpalya sa inyong pagpanerbisyo sa atong katawhan. Saludo gyud ko kaninyo.” – tipik sa pamahayag ni Governor Zubiri atol sa pakigpolong niini sa gipahigayon nga 2022 Fire Prevention Month, kaganiha – Marso 2, 2022 sa Centennial Stage, Kaamulan Park, Malaybalay City, Bukidon.

Giila ug gipasalamatan usab sa BFP-Bukidnon ang tanang suporta nga gihatag kanila sa gobernador. Sumala ni SFO1 Rafael I. Corona, Jr., ang Provincial Operations Officer nga gumikan sa pag-abag ug kanunay nga pagpaluyo kanila ni Governor Zubiri, naangkon sa maong ahensya ang L300 van sa tuig 2018, rescue truck kantidad 5 milyones ka pesos sa tuig 2021, paggahin ug matag tuig nga pondo gikan sa tuig 2020 nga sarang magamit sa operasyon sa maong opisina, ug ang pagtagana kanila ug opisina dinhi sa National and Provincial Offices (Old Hospital).

Gipadayag usab ni SFO1 Corona nga sulod ning bulan sa Marso, gilauman nga madawat na usab nila ang 1 unit fire truck with articulated boom nga nagkantidad sa 14 milyones ka pesos ug ang rescue equipment and tools nga adunay kantidad 4.5 milyones ka pesos. Nasayran nga ning tuig 2022, gigahinan usab ang BFP-Bukidnon sa sobra 1.7 milyones ka pesos alang sa mobilisasyon ug operasyon sa mga personahe niini.

Dugang pamahayag niini nga gumikan sa suporta nga nakuha sa national, provincial ug city/municipal government units, kumpleto na sa Fire Stations and 22 ka mga Local Government Units sa Bukidnon, uban kinatibuk-ang 355 ka mga personahe niini ug kinatibuk-ang 43 ka mga fire trucks.

Sa data gikan sa BFP-Bukidnon, miihap ngadto sa 177 ka mga kaso sa sunog ang narespondihan sa tuig 2020, samtang 161 usab sa tuig 2021.

Kanunay nga gipahimangno-an sa BFP ang publiko nga mag-amping ug susihon kanunay ang connection sa kuryenti nga mao ang sarang hinungdan sa sunog, uban sa tema ning tuig, “Sa Pag-Iwas sa Sunog Hindi Ka Nag-iisa.”

###