Press Release No. 39 / March 2, 2022

GIAPRUBAHAN sa Provincial School Board (PSB), pinaagi sa pagpanguna ni PSB Chairperson ug Governor Jose Ma. R. Zubiri, Jr., ang gi-presenta nga Proposed PSB Projects alang sa CY 2022 sa personahe gikan sa Department of Education (DepEd)-Division of Bukidnon atol sa gipahigayon nga panagtagbo sa miyembro niini sa PPDO Conference Room, Capitol Compound, Malaybalay City, Bukidnon kaganiha – Marso 2, 2022.

Ang kinatibuk-ang kantidad nga ₱23,800,121.43 mamahimong sukaranan sa katumanan sa gi-propose nga mga proyekto sa pagpalit ug yuta alang sa bag-o nga school site sa San Isidro E.S., sa Damulog, Bukidnon sanglit ang kasamtangan nga school site delikado sa pagdahili sa yuta, subay sa rekomendasyon sa DENR; pagpatukod sa 1 storey 2 classroom buildings sa nagkalain-laing tunghaan sa elementarya; samtang covered courts, multipurpose buildings ug perimeter fence sa nagkadaiyang tunghaan sa sekondarya; ingon man ang paggahin ug pondo alang sa digitization program sa DepEd.

Sa maong tigum, mihimo usab sa pagpaabot si Engr. Urbano U. Lampera, Jr., ang Provincial Project Monitoring and Inspectorate Team leader alang sa latest update sa status of school building projects gikan sa CY 2021 nga gilangkuban sa 65 classrooms nga pagatukoron, 34 classrooms nga ipaayo, nga adunay sobra 71 milyones ka pesos ang gi-alokar nga pondo para sa maong katuyuan. Samtang sa CY 2022, adunay 5 ka classrooms nga pagatukoron ug 3 ka classroom ug multipurpose building ang ipa-repair nga adunay dul-an 7 milyones ka pesos usab nga gigahing pondo.

Gipadangat usab ni Provincial Engineer Albert Yulo ngadto kang Governor Zubiri ang mga nag-unang kabalaka sa mga magtutudlo sa Sumilao ug Dologon, Maramag kabahin sa kanunay nga pag-flactuate sa ilang supply sa kuryenti hinungdan nga giaprubahan usab sa amahan sa lalawigan ang paggahin ug dugang pondo sobra usa ka milyon ka pesos alang sa electrification (provision of transformers).

Kanunay nga gihatagan sa gimbug-aton ni Governor Zubiri nga ang edukasyon usa ka batakang katungod sa kabataan, ingon nga walay bata nga kinahanglan nga mabiyaan. Ang PSB nakig-alayon sa mga programa alang sa edukasyon base sa probisyon sa Local Government Code (LGC). Kini nga mga programa nagtubag sa mga kabalaka sa mga eskwelahan, magtutudlo, ug mga estudyante sa elementarya ug sekondarya nga mga eskwelahan.

###