Press Release No. 41 / March 3, 2022

NASURPRISA ug dakong pagpasalamat ang gipadangat ni PBGEN Benjamin C Acorda Jr, Regional Director sa Police Regional Office 10 ngadto kang Bukidnon Governor Jose Ma. R. Zubiri, Jr. sa dihang gitugyan ngadto kaniya ang tulo (3) ka unit sa Hilux service vehicles (double cab service with troop carrier 4×4), dungan sa courtesy call niini ngadto sa local chief executive sa Bukidnon, kagahapon, Marso 2, 2022.

Sumala ni PCol Jun Mark J Lagare, Provincial Director sa PNP-Bukidnon Provincial Police Office (BukPPO) nga natungnan nga naka-andam na alang sa turnover ang maong mga salakyan sa pagbisita ni RD Acorda hinungdan nga malampuson kining nakuha na kagahapon sa kapulisan ang gihangyo nga sakyanan niadtong unang bahin sa tuig 2021 gikan sa Provincial Government of Bukidnon.

Gibutyag ni PCol Lagare nga dako kining ikatabang sa pagtuman sa mandatu sa kapulisan sa lalawigan, ilabi na sa ilang operational capability and visibility aron diha-diha nga makarespondi sa higayon nga adunay dinalian nga deployment sa tropa aron mapabilin ang kahusay ug kalinaw.

Sa data gikan sa PGO-Bids and Awards Committee, nagkantidad sa ₱1,989,000.00 ang matag unit sa maong mga salakyan nga ipahinungod sa operatiba sa BukPPO.

Gawas sa maong mga salakyan, naona na nga natunol ngadto sa BukPPO sa milabay’ng tuig 2021 ang 2 ka unit sa Nissan Van, 1 ka unit sa Nissan pick-up, ug 2 ka unit sa Man Truck 6×6. Gilauman nga aduna pa’y moabotay karong tuig 2022 nga dugang units alang sa operations and intelligence unit sa BukPPO.

“Sa tanang suporta ug pagpaluyo ni Governor Zubiri sa operasyon ug kalihukan sa kapulisan sa lalawigan, gikalipay kini namo pag-ayo tungod kay wala kami gipasagdan, anaa kanunay ang atong provincial local government nga motubag sa among panginahanglan, labi na sa pagdugang sa among move capability o mobility sa among mga personnel para maka-response sa tawag sa katawhan kung adunay emerhensya ug pag-conduct sa law enforcement operation” – mensahe pasalamat ni PCol Jun Mark J Lagare, Provincial Director sa PNP-Bukidnon Provincial Police Office sa gihimong pakighinabe kaniya sa personahe gikan ning maong buhatan.

###