Press Release No. 43 / March 4, 2022

GIHATAGAN ug importansya sa Provincial Government of Bukidnon (PGB), pinaagi sa Provincial Health Office (PHO) ang maayong panglawas sa mga kabataan, alayon sa bag-o lang gipahigayon nga Infant and Young Child Feeding (IYCF) training sa pakigtimbayayong sa Provincial Nutrition Committee (PNC), niadtong Pebrero 24-25, 2022 sa Monte Riche, Jasaan, Misamis Occidental.

Tumong sa maong training nga mapalawom pa ang kahibalo sa mga Barangay Nutrition Scholars (BNS) mahitungod sa maayong nutrition tungod kay sila man ang gitahasan nga magmonitor sa kahimsog sa mga kabataan diha sa ilang barangay. Pinaagi usab niini nga pagbansay, matabangan ang mga BNS kung unsaon nila sa pagpasabot ug pag-edukar ang mga ginikanan sa paghatag ug masustansyang pagkaon sa ilang anak ilabi na ang nag edad 0-59 months o hangtud 5-year-old.

Subay niini, gipahugtan karon sa PHO ang padayon nga pagpahigayon ug house-to-house visit nga Operation Timbang (OPT) + aron ma-ila kung kinsa sa mga kabataan nga nag-edad 0-59 months old ang undernourished aron mahatagan sa pagtagad.Padayon usab ang paghatod sa mga personahi sa PHO ug dietary supplements ngadto sa mga Municipal Nutrition Office (MNO) agi’g paghatag ug pagtagad sa mga undernourished nga kabataan ingon man sa mga mabdos nga kababayen-an.

Mahinumduman nga sa milabay nga 2021 Virtual Regional Nutrition Awarding Ceremony (RNAC), gipasidunggan ang probinsya sa Bukidnon isip 3rd time awardee sa mapadayunong programa sa pagpakunhod sa stunting rate sa kabataan sulod sa tuig 2018-2021. Lakip usab nga midawat ug pasidungog ang lungsod sa Manolo Fortich, Kibawe, Quezon, Kadingilan, Talakag, Damulog, Don Carlos, Kitaotao, Sumilao, Maramag, Cabanglasan, Impasug-ong, Kadingilan ug syudad sa Valencia. Gumikan kini sa pagsuporta sa probinsya, pinaag sa PNC ngadto sa mga lakang ug pamaagi sa matag lungsod ug syudad.

Giawhag usab sa buhatan sa PHO nga suportahan ang programa sa gobyerno, ilabi na ang OPT + ubos sa mando sa National Nutrition Committee (NNC) Governing Board Resolution No. 2 s. 2021, nga adunay tumong alang sa maayong panglawas sa mga kabataan, hatagan ug pakan-on sila sa mga pagkaong puno sa nutrisyon ug kanunay e-monitor ang ilang timbang (weight) ug katas-on (height), aron masiguro nga ang kabataan magtubo nga himsog ug luwas sa sakit.

###