Press Release No. 45 / March 7, 2022

GISUGDAN na sa Population and Development (POPDEV) Division ang paggamit sa bag-ong gimugna nga database o sistema sa mas dali nga profiling ug pagmonitor sa dagan sa populasyon sa probinsya, pinaagi sa pagpahigayon ug usa ka presentasyon niini ngadto sa mga Barangay Service Volunteer nga gisugdan niadtong Marso 2, 2022 didto sa Barangay Salimabalan, Baungon, Bukidnon.

Subay sa mandatu sa Provincial Government of Bukidnon nga matunol ngadto sa labing nanginahanglan ang mga batakang serbisyo, gihingusgan sa POPDEV ang paghan-ay sa database system, aron mas paspas na ang pag survey sa ihap sa populasyon sa usa ka barangay o munisipalidad, ingon man sa women of reproductive age, gidaghanon sa panimalay ug uban pa, tungod kay computerize naman kini ug dili na mano-manuhon pa. Pinaagi usab niini, mas dali nga mahibaloan ug matumbok kung unsa ang giatubang nga problema sa usa ka panimalay, purok o barangay sama sa water system, suga, dangerzone, toilet o pansayan ug mga programang pang-edukasyon gikan sa gobyerno, hinungdan nga mas dali usab ang pagsulbad ug pahatag sa pagtagad niini.

Ang mga datus gikan sa barangay pagakuhaon sa Local Government Unit (LGU) aron ma-consolidate ug mabuhatan sa mga plano ug programang pang-kalambuan nga ilang mapahimuslan hangtud sa umaabot nga panahon.

Sa pakighinabi ngadto kang Mr. Jorey John Barredo, ang area supervisor sa POPDEV, gibutyag niya nga ang maong lakang gipatuman aron matabangan ang gobyerno nga makab-ot ang tinguha nga mabalanse ang populasyon ug adunay insaktong pag-apod-apod sa proyekto ngadto sa lokalidad nga mas labing nanginahanghlan.

Dugang ni Mr. Barredo nga ang maong database system gipa-ila-ila na sa POPCOM sa milabay nga tuig pinaagi sa usa ka pilot seminar ngadto sa lungsod sa Damulog apan wala na kini nasundan pa tungod sa hulga sa pandemya. Busa, gipalambo kini ug gipadayon sa POPDEV ug gitinguha nga ipahigayon ang presentasyon matag bulan sa tanang barangay sa probinsya aron kanunay nga bag-o ug updated ang ilang data ug masiguro nga mahatagan gayud sila sa pagtagad nga ilang gikinahanglan.

###