Press Release No. 49 / March 10, 2022

PORMAL nang gi-turnover sa Provincial Government of Bukidnon (PGB) ang bag-ong Regional Trial Court (RTC) Branch 11 Office Building ngadto sa RTC- Branch 11, pinaagi sa usa ka Blessing & Inauguration niadtong Marso 8, 2022 sa Tankulan, Manolo Fortich, Bukidnon.

Si Atty. Paul Vincent G. Villegas, Provincial Legal Officer/OIC Provincial Administrator, kinsa mitambong isip representante ni Governor Jose Ma. R. Zubiri, Jr., mipaabot sa iyang pagtimbaya ngadto sa tibuok pwersa sa RTC Branch 11, pinangulohan ni Executive/Presiding Judge Hon. Jeanne Marie A. Abarrientos tungod sa malampusong katukuran sa ilang bag-ong opisina.

Kinasingkasing usab nga nagpaabot si Presiding Judge Abarrientos sa iyang dakong pagpasalamat ngadto kang Governor Zubiri, Sangguniang Panlalawigan pinangulohan ni Vice Governor Rogelio N. Quiño ug Municipal Mayor Clive D. Quiño tungod sa ilang walay puas nga suporta aron mahatagan ug katumanan ang ilang gihandom nga opisina ug mapalambo pa ang ilang serbisyo ngadto sa mga kalungsurang sakop sa 1st District o Northern part sa Bukidnon. Dugang pahayag niini nga pagka-ugma mismo-Marso 9, 2022 magamit na nila ang court room alang sa ilang mga nakahan-ay nga hearing.

Sa data gikan sa Provincial Project Monitoring & Inspectorate Team (PPMIT), mokabat sa kapin 5 milyones ka pesos ang gibubo nga pundo sa probinsya alang sa construction of Hall of Justice Phase I nga gisugdan sa tuig 2018, Phase II nga gisugdan sa tuig 2020 ug construction of perimeter fence nga gisugdan sa susamang tuig.

Mitambong usab sa maong kalihukan ang mga mayores sa 1st district nga sila si Mayor Clive Quiño sa Manolo Fortich, Mayor Osmundo N. dela Rosa sa Malitbog, Mayor Vergito O. Factura sa Talakag, Mayor Aurelio B. Lopez ug Vice-Mayor Leonardo Genesis T. Calingasan sa Libona. Mitambong usab sila si Fiscal Aldrich Uayan ug Fiscal Kristofferlean Miole nga gikan sa Provincial Prosecutors Office, Atty. Reymund Inihao gikan sa Public Attorney’s Office, personahi gikan sa Manolo Fortich Parole & Probation Office, PNP-Manolo Fortich, Manolo Fortich Bureau of Jail Management and Penology (BJMP) ug Community Environment & Natural Resources Office (CENRO).

###