Press Release No. 51 / March 11, 2022

“Ako nanghinaut nga makahatag kini ug development diri sa Barangay Base Camp tungod kay kung maplastar ang katawhan, maayo ang pamuyo, ang huna-hunaon na lang ang iyang panginahanglan kay duna naman siyaý balay nga kapasilongan, ang iyang pamilya adunay kapuy-an, maka-eskwela ug ensakto ang kabataan. So, makapanginabuhi ug ensakto…”

Kini ang tipik sa mensahe ni Maramag Municipag Mayor Jose Joel P. Doromal atol sa iyang pakigpolong sa gipahigayon nga Groundbreaking Ceremony alang sa dugang katukoran sa 100-houses sa Base Camp Paglaum Village Phase II, Base Camp, Maramag, Bukidnon niadtong Marso 10, 2022.

Gihatagan ug gimbug-aton ni Mayor Doromal ang mga mapadayonong paningkamot sa Provincial Government of Bukidnon (PGB) ubos sa pagpanguna ni Governor Zubiri, diin kinasing-kasing kining gipasalamatan kay siya man ang gihimong instrumento sa Ginoo nga matagamtaman sa katawhan ang padayon nga paghatag ug benepisyo sa kabus ug nanginahanglan. Gipasabot usab ni Mayor Doromal nganong igo lang napangunahan ni Governor Zubiri ang Ribbon Cutting aron usab maasikaso ug maatubang ang uban pang bulohaton niini sa tibuok probinsya.

Ang maong proyekto haom sa Health and Social Services sa Pillars of Good Governance ni Governor Zubiri, kung aha pinaagi sa pakigsabot sa Municipal Governrment sa Maramag ingon man sa Barangay Government sa Base Camp, nahatagan sa dalan ang maong proyekto nga maghatag kabalayan sa homeless and landless families sa Barangay Base Camp. Natagana ang 33 milyones ka pesos sa PGB alang sa katukoran sa 100-houses, diin gitagana usab sa barangay government ang 43, 529 square meters alang sa maong proyekto ug abagahon usab sa municipal government ang land development, water and power distribution system, ingon man ang pagmontar sa dalan ug canal.

Ang matag unit adunay 100 square meters nga average lot size, diin ang 30 square meters niini ang mamahimong floor area ug gilauman nga mahuman ang pagtrabaho niini sa Mayo ning tuig 2022.

Mahinumduman nga niadtong tuig 2011, unang natunol sa PGB ang 50 ka mga housing units sa Base Camp Paglaum Village Phase 1.

Mitambong sa maong kalihukan ang tibuok pwersa sa LGU-Maramag, Base Camp Barangay Council pinangunahan ni Punong Barangay Alfredo Acala, Board Members Joseph Palmada ug Benito Baguio, Provincial Engineer Albert Yulo, personahe sa PGO-REHDD sa pagpanguna ni Engr. Walter Borres, ingon man ang mga benificiaries.

###