Press Release No. 50 / March 11, 2022

GIPAHIGAYON ang Groundbreaking Ceremony alang sa pagatukuron nga 41 ka housing units sa Bukidnon Resettlement Project (BRP) Phase VI sa Purok 17, Landing, Casisang, syudad sa Malaybalay, niadtong Marso 9, 2022, nga gipangulohan ni Fr. Jose “Jojo” Sumastre sa Immaculate Conception Parish.

Gipaabot ni Atty. Paul Vincent G. Villegas, ang Provincial Legal Officer/OIC Provincial Administrator, kinsa nagrepresenta kang Governor Jose Ma. R. Zubiri, Jr., ang iyang kalipay ug pagtimbaya sa mga benepisyaryo nga ang ilang gihandom nga balay sa pila na katuig mahatagan na gayud ug katumanan, pinaagi sa pagpaningkamot sa pangagamhanang probinsyal.

Personal usab nga mipaabot sa dakong pagpasalamat si Malaybalay City mayor Atty. Jay Warren Pabillaran sa ubay-ubay nga mga programa ug proyekto sa probinsya diin nakapahimulos ang katawhan sa Malaybalay, ilabi na niining housing project nga dakong tabang sa mga pamilya aron makaangkon sila sa desinte ug hamugaway nga panimalay. Gipahimangnoan usab niya ang mga benepisyaryong pamilya nga ampingan ug amomahan kini nila pag-ayo aron mapahimuslan pa sa ilang mga anak sa umaabot nga katuigan.

Emosyanal usab nga nagpasamalat si Mrs. Manuela Angkig, usa sa mga benipisyaryo sa maong proyekto, ngadto sa tanang nagpaluyo ug naningkamot nga mahatagan ug katumanan ang ilang pangandoy, ingon man kang Governor Zubiri nga wala gayud nalimot sa paghatag ug pagtagad kanila nga mga pamilyang nanginahanglan.

Lakip nga mitambong sa maong seremonya sila si Provincial Engineer Albert Yulo, Provincial Budget Officer Fe C. Retuertas, REHDD supervising home management specialist Engr. Walter V. Borres ug PGO-PAIA Supervising Administrative Officer Hansel T. Echavez.

###