Press Release No. 52 / March 15, 2022

GIHANGYO sa 26th Sangguniang Panlalawigan (SP) ang Department of Public Works & Highways (DPWH) 3rd District Engineering Office (DEO) nga magdumala sa pagmentinar sa kaanindot sa “Welcome to Bukidnon” landmark nga nahimutang sa Alae, Manolo Fortich, Bukidnon, pinaagi sa Resolution No. 2022-4114 (26th SP), pinetsahan Pebrero 22, 2022, nga giduso ni 2nd District board member Atty. Nemesio B. Beltran, Jr.

Mahinumduman nga sugod pa sa tuig 2009, ang DPWH 3rd DEO na ang gitahasan nga mag-mintenar sa kaanindot ug mag-atiman sa maong landmark, ilabi na panahon sa kasaulogan sa Kaamulan, pinaagi sa Resolution No. 2009-1220, gani tungod niini, gipasalamatan ug gidayig sila sa 10th SP pinaagi na usab sa usa ka resolution.

Apan naobserbahan nga kung walay kasaulogan sa Kaamulan, dili na kini mahatagan ug igong pagtagad ug mapasagdan na lamang. Busa, gipanghingusgan sa 26th SP nga angayan lamang ibalik ug ipadayon ang pag-atiman niini, ilabi na kay mao kini ang nahimong ganghaan o entrada pasulod sa malambuong probinsya sa Bukidnon.

###